Pas një viti luftë me kancerin, mëngjesin e sotëm ndërroi jetë Xhavit Ferizi, i njohur si Raketa. Ai ishte ushtar i UÇK-së e për më shumë se dy dekada shërbeu edhe si truprojë e ish-presidentit, Hashim Thaçit. Familjarë e bashkëluftëtarë me dhimbje kujtuan kontributin e tij.
Është lufta e vetme që e ka humb realisht, lufta me kancerin.
Me sytë të mbushur me lot, Selvije Ferizi rrëfen për vdekjen e babait, Xhavit Ferizit.
I njohur si Raketa, Ferizi ishte pjesë e Ushtrisë Çlirimtare të Kosovës.
E për më shumë se dy dekada, ai shërbeu edhe si truprojë e ish-presidentit të Kosovës, Hashim Thaçit.
Prandaj sipas saj, i ati jetoi e vdiq me një peng.
“Sëmundja e tij ka ardhë pa prit, realisht ka qenë shumë i fort. Njëra prej arsyeve që ia ka shfaq sëmundjen ka qenë padrejtësia e madhe që po ndodhë ndaj liderëve të Kosovës, Hashim Thaçit bashkë me të tjerët, ka qenë një shqetësim i vazhdueshëm me të cilin merak ka vdekë, tha vajza e madhe e Xhavitit, Selvije Ferizi.
I shqetësuar për gjendjen e Raketës ishte edhe Thaçi.
“E ka ditë, vazhdimisht kanë folë në telefon, edhe ai ka qenë shumë i shqetësuar për gjendjen e tij, edhe ky për gjendjen e tij”, u shpreh vajza e të njderit.
E kurora lulesh i dërgoi gjatë ditës ish-presidenti Thaçi.
E para Shtabit të Përgjithshëm të UÇK-së në Likoc të Skënderajt, me dhimbje e kujton shoku i luftës e i gjeneratës, Sami Lushtaku.
“Me dhimbje sot e mora lajmin e vdekjes së një bashkëluftëtari. Është një ditë tepër e vështirë për mu e sidomos për të gjithë ata bashkëluftëtarë të cilët e kanë njohur dhe të gjithë ata që kanë punu me të dhe kanë vepru bashkë me të. Kontributi i tij ka qenë edhe para luftës po sidomos gjatë luftës. Shtëpia e tij ka qenë edhe kazermë, edhe shtab edhe gjithçka që ju ka desht UÇK-së. Edhe falë tij, punës së tij, organizimit që ai e ka bërë me këtë lokalitet, vërtetë është për t’u çmu dhe respektu”, deklaroi is-kryetari i Skenderajt, Sami Lushtaku.
Për cilësitë e tij në luftë tregon edhe miku i tij, Haki Aruçi.
“Dolëm në patrullë me ta gjatë vëzhgimeve të situatës, siç ka qenë në atë pjesën tonë anej, Xhaviti ka qenë një burrë i ndershëm, ka qenë një burrë i fjalës, i besës”, tha kryetari i invalidëve të luftës në Skenderaj, Haki Aurçi.
Xhavit Ferizi – Raketa ndërroi jetë në moshën 64 vjeçare, pas një vit lufte me kancerin.
Shtëpia e tij gjatë luftës shërbeu si kazermë e shtab i Ushtrisë Çlirimtare të Kosovës.
