Lajmin për teve1.info e ka konfirmuar edhe drejtori i Kardiokirurgjisë, Rifat Brahimaj, i cili tha se mjeku që e kreu ndërhyrjen ishte jokompetent për atë operacion.
Brahimaj tha se do të ndërmerren masa ndaj mjekëve të cilët e kishin kryer këtë operacion.
“Të hysh në një procedurë të tillë pa pasur përvojën e duhur dhe ta paraqitësh si sukses, e pacienti ndërron jetë pas disa orësh, kjo është hipokrizi. Mjekët që e kanë kryer këtë operacion nuk janë kompetent për ndërhyrje të tilla, sepse ata kanë vështirësi edhe në procedura standarde. Duhet të bëhet një vlerësim i rastit. Së pari është e ndaluar me rregullore të SHSKUK-së publikimi i rasteve të tilla. Kjo është shkelja e parë që e kanë bërë mjekët dhe sigurisht se duhet të merren masa”, tha Brahimaj.
Ai shtoi se gjendet në pushim dhe se posa të kthehet së bashku me drejtorinë e SHSKUK-së, do të merren me rastin dhe se do të merren masa.
“Ata kanë licencën e kardiokirurgut dhe ne nuk mund t’i ndalojmë të kryejnë operacione ose të iu tregojmë se cilat operacione t’i kryejnë, por duhet të shikohet rasti dhe të merren masa.
Pacientët mund të vdesin nga komplikime edhe në rastet më të lehta, por në këtë rast është kryer një procedurë nga persona jo kompetent ”, ka thënë Brahimaj.
Operacionin pas të cilit ndërroi jetë pacienti, mjeku i cili kishte intervenuar e kishte publikuar në Facebook duke e cilësuar si të suksesshëm.
Megjithatë, për rastin dhe rrethanat e vdekjes së pacientit nuk ka raportuar Instituti i Mjekësisë Ligjore.
