Një person i moshës 48-vjeçare ka humbur jetën si pasojë e lëndimeve të marra në vendin e punës në Shtime.
Lajmi është konfirmuar për Tëvë1 nga zëdhënësi i Policisë për rajonin e Ferizajt, Kanun Veseli, i cili bëri të ditur se viktima është dërguar me urgjencë në Emergjencën e Ferizajt, por nuk ka arritur t’u mbijetojë plagëve.
“Ju njoftojmë se më datën 15.04.2026, rreth orës 20:45, kemi pranuar një informatë se në një kompani në zonën industriale në Shtime, një person (punëtor) rreth 48 vjeç është lënduar gjatë punës. Ai është dërguar menjëherë në Emergjencën e Ferizajt, ku nga ekipi mjekësor është konstatuar vdekja e tij”, ka deklaruar Veseli.
Ai shtoi se njësitet relevante policore kanë dalë menjëherë në vendin e ngjarjes, përfshirë patrullat dhe hetuesit policorë.
“Gjithashtu janë njoftuar edhe hetuesit dhe krim-teknikët nga Sektori Rajonal i Hetimeve, prokurori i shtetit, si dhe Inspektorati i Punës, të cilët kanë dalë në vendin e ngjarjes për ndërmarrjen e veprimeve të mëtejme hetimore”, tha Veseli.
Rrethanat e aksidentit mbeten ende në hetim
