Një grua ka humbur jetën të enjten në Lipjan, në një rast që policia po e heton si vdekje të dyshimtë.
Sipas raportit 24-orësh të Policisë së Kosovës, një dëshmitare ka njoftuar se viktima, shtetase e Kosovës, në rrethana ende të paqarta është rrëzuar papritur në tokë.
“Ekipi emergjent ka dalë në vendin e ngjarjes, ku është konstatuar vdekja e viktimës”, thuhet në raportin e policisë.
Lidhur me rastin është njoftuar prokurori kompetent, i cili ka urdhëruar që trupi i pajetë të dërgohet në Institutin e Mjekësisë Ligjore (IML) për obduksion, me qëllim të përcaktimit të shkakut të vdekjes.
Policia ka nisur hetimet për të sqaruar rrethanat e këtij rasti.
