Regjisori i mirënjohur shqiptar Piro Milkani është shuar në moshën 86-vjeçare. Lajmin për ikjen nga kjo botë e ka dhënë vetë i biri i tij, Eno Milkani i cili shkruan në rrjetet sociale: “Iku babai, shoku dhe kolegu im”.
Milkani ishte një prej figurave më të shquara të kinematografisë shqiptare, ku ka dhënë një kontribut të rëndësishëm në artin e regjisurës.
I lindur më 5 janar 1939 në Drenovë të Korçës, Milkani ishte një nga kineastët e parë të kinematografisë shqiptare, duke realizuar filma që mbetën në kujtesën e shikuesve.
Filmat e tij si “Ngadhnjim mbi vdekjen”, “Çifti i lumtur”, “Zonja nga qyteti” u bënë pjesë e identitetit kulturor shqiptar.
Pas mbarimit të shkollës së mesme në qytetin e tij, ai vazhdoi studimet në Akademinë e Arteve të Bukura në Pragë, Çekosllovaki, ku u diplomua si operator filmi.
Gjatë viteve të studimeve, ai realizoi filmin e tij të diplomës, Nenavist (Mosmirënjohja), i cili shënoi fillimin e një karriere të suksesshme në kinematografi.Pas kthimit në Shqipëri, Milkani filloi punën në Kinostudion “Shqipëria e Re” si operator dhe më pas si regjisor ku realizoi mbi 20 filma artistikë.
Për kontributin e tij të jashtëzakonshëm në kinematografinë shqiptare, Milkani është nderuar me tituj dhe çmime të shumta, përfshirë titullin “Artist i Popullit” (1987) dhe medaljen “Ambasador i Filmit Shqiptar” nga Ministria e Kulturës e Shqipërisë.
Ndërkaq, Arkivi Shtetëror i Filmit shkruan se ‘humbja e tij është një plagë e madhe për kulturën shqiptare. Ngushëllime të sinqerta familjes Milkani, miqve dhe gjithë komunitetit të kineastëve.
Ndërsa shton se “përveç kontributit të tij si regjisor, Milkani ishte edhe një edukator i përkushtuar, duke ndihmuar në formimin e brezave të rinj të kineastëve shqiptarë
Ai ishte një njeri i urtë, i dashur dhe i respektuar nga të gjithë ata që patën fatin ta njihnin. Një mik i përjetshëm i Arkivit ku me adhurim thonim se Piro është si një libër i hapur për ndodhitë e historitë e Kinostudios”.
