E marta doli të jetë tragjike për një 26-vjeçar.
Ky i fundit humbi jetën pas rrëzimit të këtij vinçi në Lagjen e Spitalit në Prishtinë.
E në këtë rast, me lëndime të rënda përfundoi edhe bashkëpunëtori i tij.
Për këtë të fundit, nga QKUK të enjten thonë se ndodhet në gjendje stabile.
“Pacienti që ju i referoheni vazhdon të marrë tretmanin e mëtutjeshëm mjekësor në Njësinë Intensive të QKUK-së. Për momentin gjendja e përgjithshme tij sa i përket parametrave vital prezantohet të jete stabile edhe pse lëndimet janë serioze. Vazhdon te jete i monitoruar dhe te marre tretmanin e nevojshëm mjekësor”, ka njoftuar Uka.
E për këtë rast, të mërkurën u bë e ditur se në ndalim përfunduan tre persona.
“Me urdhër të Prokurorit të Shtetit janë ndaluar tre persona me inicialet A.Sh., nën dyshimin e kryerjes së veprës penale ‘’Shkaktimi i rrezikut të përgjithshëm’’, si dhe B.S., në cilësinë e personit përgjegjës të kompanisë ndërtuese, dhe E.E., në cilësinë e personit të kompanisë investuese të projektit , nën dyshimin e kryerjes së veprës penale ‘’Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës’’, nga neni 358, paragrafi.7 i Kodit Penal të Republikës së Kosovës”, ka njoftuar Prokuroria Themelore Prishtinë.
E pas rastit, reagoi edhe ministrja në detyrë e Mjedisit dhe Planifikimit Hapësinor.
Kjo e fundit tha se përgjegjësia për këtë ngjarje, bie mbi Komunës së Prishtinës.
“Në cilësinë e Ministres së Mjedisit dhe Planifikimit Hapësinor, theksoj se përgjegjësia kryesore dhe e drejtpërdrejtë për lejimin, mbikëqyrjen e sigurisë dhe parandalimin e këtyre rasteve bie mbi Inspektoratin Komunal të Ndërtimit dhe vetë Komunën e Prishtinës. Këto dështime të njëpasnjëshme të nivelit lokal kërkojnë llogaridhënie të menjëhershme dhe të pashmangshme”, u shpreh Pacolli.
E pas kësaj, reagoi edhe i pari i Prishtinës.
Perparim Rama tha se kompetenca i takon, Inspektoratit Qendror të Punës.
“Rrethanat e aksidentit po hetohen nga organet kompetente. Vlerësimi i respektimit të standardeve të sigurisë dhe mbrojtjes në punë është kompetencë e Inspektoratit Qendror të Punës, institucion në kuadër të nivelit qendror, dhe presim që hetimet të zbardhin plotësisht shkaqet dhe përgjegjësitë për këtë rast”, ka thënë Rama.
E nuk vonoi shumë, me një reagim dolën edhe Inspektorati Qendror i Punës.
Fillimisht nga ky Inspektorat të martën thanë se subjekti në fjalë nuk ka qenë i inspektuar më parë për shkak se punimet ndodheshin në fazën fillestare të ndërtimit.
E të mërkurën, dolën me një sqarim me të gjatë, duke thënë se rasti kërkon hetime dhe ekspertiza të mëtejshme.
Por, cilat janë shkaqet që çojnë në vdekjet tragjike të punëtoreve në vendin e punës?
“Do të thotë, neglizhenca është fund e krye e mosmarrjes së masave. Urgjent duhet të merren masa nga shteti dhe nga punëdhënësit, përndryshe duhet të mbyllen vendpunishtet. Është e turpshme që të humbë jetën një njeri nga pajisja gjatë montimit, apo të dëmtohen edhe objekte të tjera dhe të rrezikohen njerëzit. Ka mundur të jetë edhe dikush tjetër, ka mundur të ndodhë një fatalitet edhe më i madh. Mjerisht, neglizhenca është kryekëput shkaku i asaj që po ndodh”, ka thënë Bajraktari.
Ndryshe, nga rrëzimi i vinçit të martën, me dëme të konsiderueshme materiale përfundoi edhe kjo shtëpi në afërsi të vendpunishtes.
