Shumë dëshmitar e të mbijetuar të masakrave të luftës së fundit në Kosovë kanë vdekur. Si pasojë e kohës së gjatë që nga lufta, rrezikohet të zbehet kujtesa dhe dëshmitë të përfundojnë në varr. Shqetësues po vlerësohet ky fakt nga organizatat dhe të mbijetuarit e luftës.
Ish-ushtari i Ushtrisë Çlirimtare të Kosovës, Arton Hoti, ishte 17 vjeçar kur me bashkëluftëtarët e tij i kishin varrosur viktimat e masakrës së Izbicës në Skenderaj.
Por, ani pse kanë kaluar më shumë se dy dekada nga mizoria e 28 marsit të vitit 1999, Hoti nuk është ftuar asnjëherë të dëshmoj për këtë krim.
“shumë e dhimbshme sepse shkun 25 vite dhe nuk i kanë marrë në pytje dëshmitarët që kanë qenë në masakrën e Izbicës ku fatbardhësisht kanë shpëtu 6 veta po fatkeqësisht jetojnë vetëm 3, 2 janë që nuk mund të flasin dhe një që flet zellshëm dhe shko në cdo emision baçi Milazim Thaçi.”, tha Arton Hoti, ish ushtari i UÇK-së.
Si Hoti, ka edhe shumë të tjerë që kanë qenë dëshmitarë të masakrave të kryera gjatë luftës.
Por, shumica prej tyre kanë vdekur dhe kështu dëshmitë janë varrosur pa u dëgjuar.
Amer Alija nga Fondi për të Drejtën Humanitare, thotë që koha është armiku kryesor, pasi kujtesa zbehet dhe dëshmitarët po vdesin.
“25 vite pas luftës, dhjetra apo qindra dëshmitarë okularë kanë humbur jetën, edhe nëse ata kanë japur dëshmitë e tyre para misioneve të ndryshme qoftë UNMIK, EULEX apo organizata, deklarata e tyre për tu përdorur ka me qenë shumë sfiduese.), u shpreh Amer lija nga Fondi për të Drejtën Humanitare.
E Shkendije Hoda nga shoqata “Krimet e Luftës” mbetet optimiste se do të intensifikohet puna për mbledhjen e dëshmive dhe dëgjimin e dëshmitarëve.
“Ndoshta është edhe mungesa e vullnetit prandaj edhe po na vdesin dëshmitarët është mungesa për të dëgju zërin e qytetarit dhe atij që ka përjetu dhe që ka qenë dëshmitarë okular në vendin ku ka ndodhë krimi, shpresojmë që mos të vazhdojë kështu, meqë ka filluar punën edhe instituti për krimet e luftës.”, tha SHkëndije Hoda nga Shoqata “Krimet e Luftës”.
Së fundmi, ka vdekur edhe dëshmitari i masakrës në Pastasel të Rahovecit, Beqir Krasniqi, duke lënë kështu Tahir Krasniqin si të vetmin dëshmitar dhe të mbijetuar të kësaj masakre.
Autore: Gresa Bardhecaj
