Sot do të vazhdojë procesi gjyqësor në Hagë, ku mbrojtja e Jakup Krasniqit do ta bëjë deklaratën hyrëse në gjykim.
Kjo seancë pritet të fillojë nga ora 09:00, përcjell teve1.info
Të hënën nisi gjykimi ndaj Hashim Thaçit, Kadri Veselit, Rexhep Selimit e Jakup Krasniqit, me deklaratën hyrëse të Prokurorisë, kurse në seancën e djeshme fjalën mbrojtëse e dhanë para gjyqit avokatët e Thaçit, Veselit e Selimit.
Ish-presidenti i Kosovës, Hashim Thaçi pret që në fund të procesit gjyqësor të shfajësohet nga të gjitha akuzat të cilat rëndojnë mbi të.
Ai i është drejtuar Gjykatës Speciale duke thënë se ndjen keqardhje për të gjitha viktimat e luftës, por ka shtuar se viktimat nuk marrin drejtësi kur ndiqen të pafajshmit.
Gjatë deklaratës së tij, Thaçi ka thënë se është i pafajshëm për të gjitha akuzat.
Ndërsa, ish-anëtari i Shtabit të Përgjithshëm të UÇK-së, Rexhep Selimi ka thënë se nuk ka frikë nga drejtësia, por nga padrejtësia.
Selimi ka theksuar se do të vërtetohet pafajësia e tij, sepse lufta nuk është e mirë për askënd.
Teksa, Ben Emmerson, avokat i Kadri Veselit, ka thënë se Prokuroria në Speciale nuk e ka asnjë dëshmi “që mund ta vërtetojë se Veseli ka qenë pjesë e ndonjë ndërmarrjeje kriminale”.
Sipas tij, në periudhën për të cilën akuzohet, Veseli ka qenë kryesisht jashtë Kosovës.
Gjykata Speciale ka njoftuar se 140 persona janë pranuar si viktima pjesëmarrëse në procesin gjyqësor.
Aktakuza ndaj ish-krerëve të UÇK-së, lidhur me pretendimin për krime lufte, është konfirmuar më 26 tetor 2020. Në paraqitjet e tyre të para në Dhomat e Specializuara në Hagë ata janë deklaruar të pafajshëm.
Ata po qëndrojnë në paraburgim në Hagë prej nëntorit të vitit 2020. /Teve1.info/
