Në Qendrën e Numërimit dhe Rezultateve po vazhdon procesi i përpunimit të votave të ardhura me postë nga zgjedhjet e parakohshme të 7 qershorit.
Gjatë ditës së hënë, ekipet e numërimit kanë vazhduar me verifikimin dhe numërimin e pakove postare. Nga gjithsej 223 pako të pranuara deri tani, janë përfunduar 80, që përbëjnë rreth 35.9 për qind të totalit.
Të dhënat e fundit të publikuara nga Komisioni Qendror i Zgjedhjeve tregojnë se Lëvizja Vetëvendosje vazhdon të udhëheqë bindshëm në votat e diasporës me 69.67 për qind. Në vendin e dytë renditet Lidhja Demokratike e Kosovës me 15.17 për qind të votave të numëruara deri më tani.
Partia Demokratike e Kosovës mban pozitën e tretë me 7.98 për qind, ndërsa Aleanca ka siguruar 5.34 për qind të mbështetjes nga votuesit jashtë vendit.
