Valon Aliu, i akuzuar për vrasjen e ish-bashkëshortes së tij, Erona Cokli, në ambientet e Qendrës për Punë Sociale në Ferizaj në prill të vitit 2024, është deklaruar i pafajshëm për veprën penale të vrasjes së rëndë dhe kanosjes.
Gjatë asaj seance, ai pranoi fajësinë për armëmbajtje pa leje, ndërsa Gjykata ka marrë aktvendim për pranimin e fajësisë për këtë pikë të aktakuzës.
Ndërkohë, seanca e shqyrtimit gjyqësor ndaj Aliut po vazhdon sot në Gjykatën Themelore në Ferizaj.
Avokati mbrojtës i të akuzuarit, Ramadan Sylejmani, ka kundërshtuar ekspertizën psikiatrike të kryer ndaj klientit të tij, duke pretenduar se ajo nuk është objektive dhe kërkoi që të mos merret si provë vendimtare në shqyrtimin e fajësisë.
Valon Aliu akuzohet se më 12 prill 2024 kishte qëlluar për vdekje ish-bashkëshorten e tij Erona Cokli brenda objektit të Qendrës për Punë Sociale në Ferizaj, ku ndodheshin për çështje të kujdestarisë ndaj fëmijëve të tyre. Vrasja kishte shkaktuar tronditje të madhe në opinionin publik dhe ishte dënuar gjerësisht nga institucionet dhe shoqëria civile.
Procesi gjyqësor ndaj Aliut është ende në vazhdim dhe pritet që seancat e radhës të zbardhin më tej rrethanat dhe përgjegjësinë penale për këtë rast të rëndë.
