Të paktën 18 civilë u vranë dhe gati 200 të tjerë u plagosën në Ukrainë si pasojë e sulmeve me dronë, raketa dhe artileri nga forcat ruse, njoftuan zyrtarët ditën e martë.
Ndërkohë, presidenti ukrainas, Volodymyr Zelenskyy kërkoi garanci për ndihmë të mëtejshme nga Perëndimi për të mbështetur përpjekjet e vendit të tij për të përballuar agresionin rus.
Një nga sulmet më të rënda ndodhi në qytetin qendror Dnieper, ku një raketë balistike ruse goditi disa objekte civile, duke shkaktuar nëntë viktima dhe plagosjen e të paktën 164 personave. Në qytetin fqinj Samarit, dy persona u vranë dhe 11 të tjerë u plagosën, sipas kreut të administratës rajonale të Dnipros, Serhii Lysak.
Sipas kryetarit të bashkisë së Dnipros, Borys Filatov, sulmet shkaktuan dëme në 19 shkolla, 10 kopshte, një shkollë profesionale, një shkollë muzike dhe një zyrë të mirëqenies sociale, si dhe në tetë objekte shëndetësore.
Sipas Kombeve të Bashkuara, gjatë gjithë luftës, e cila ka hyrë në vitin e katërt, mbi 12,000 civilë janë vrarë deri tani.
Në të njëjtën kohë, Ukraina ka nisur sulme me dronë me rreze të gjatë veprimi në territorin rus, duke goditur edhe zona të banuara, ka raportuar AP.
Të martën, Zelenskyy pritej të takohej me liderët perëndimorë në një samit të NATO-s në Hagë të Holandës.
Ai është i përqendruar në sigurimin e mbështetjes ushtarake shtesë për Ukrainën, pasi negociatat e fundit të drejtpërdrejta për paqe nuk kanë sjellë përparim.
Analistët paralajmërojnë se ndihmat ushtarake aktuale nga SHBA-ja, të miratuara nga administrata Biden, do të përfundojnë brenda pak muajsh dhe ekziston pasiguri nëse presidenti Trump do të vazhdojë të mbështesë Ukrainën në të njëjtën mënyrë.
Në një postim në Telegram, Zelenskyy theksoi se Rusia varet nga komponentët e importuar për të ndërtuar raketat e saj balistike dhe u bëri thirrje vendeve partnere të bllokojnë përpjekjet e Kremlinit për t’i siguruar ato përmes “skemave të fshehta.”
Ai gjithashtu kërkoi që sanksionet kundër Rusisë të përforcohen ndjeshëm.
