Policia e Kosovës ka arritur të identifikojë tre persona të dyshuar në lidhje me plagosjen që ka ndodhur pas të shtënave me armë zjarri mes dy grupeve në rrugën Gjilan–Kamenicë, të mërkurën.
Sipas policisë, dy nga të dyshuarit janë arrestuar dhe me vendim të prokurorit janë dërguar në mbajtje, ndërsa për të dyshuarin e tretë po vazhdojnë hetimet.
I plagosuri, fillimisht ka marrë trajtim mjekësor dhe më pas është dërguar në Qendrën Klinike Universitare të Kosovës (QKUK).
Në raportin e Policisë së Kosovës thuhet se është raportuar për një shkëmbim zjarri nga veturat mes dy grupeve, ku si pasojë ka mbetur i plagosur një person. Njësitë hetimore kanë arritur të identifikojnë tre të dyshuar meshkuj kosovarë, prej të cilëve dy janë arrestuar.
Gjatë operacionit janë konfiskuar 7 gëzhoja të kalibrit 9 mm, dy karikatorë me 18 fishekë të kalibrit 7.62 mm, telefona mobilë si dhe dy vetura.
Hetimet për zbardhjen e plotë të rastit po vazhdojnë. /teve1.info/
