Zona mbeti e rrethuar nga një ditë më parë.
Ndërsa vetëm disa metra tutje, ekipet përkatëse u mblodhën sërish.
Këtë të mërkurë u shënua dita e dytë e gërmimeve këtu në fshatin Kalludër të Zubin Potokut.
Në këtë lokacion, që nga orët e paradites, vazhduan gërmimet nën dyshimin se ndodhen eshtrat e 23 personave të zhdukur gjatë luftës së fundit në Kosovë.
E tetë orë pas, punimet u ndërprenë.
E pranishme gjatë ditës aty ishte edhe ministrja në detyrë e Drejtësisë, Donika Gërvalla.
Kjo e fundit tha se ekipet janë duke e kryer gjithë procesin në mënyrë profesionale.
“Të gjitha njësitë e përfshira në punë janë duke bërë punën e tyre dhe shpresojmë që së shpejti të kemi rezultate sa më të sakta edhe sa më konkrete, me qëllim që të mund t’i informojmë familjarët që t’i varrosin më në fund. Nuk është koha për spekulime dhe zhurmë t’i lëmë profesionistët ta bëjnë punën e tyre”, deklaroi Gërvalla.
Ajo shtoi se çdo hap në drejtim të zbulimit të varrezave masive është i rëndësishëm, si për drejtësinë, ashtu edhe për familjarët e viktimave.
“Është lajm i mirë që është gërmuar dhe që gërmimi ka sjellë rezultate. Është po ashtu e rëndësishme që institucionet të vazhdojnë punën për gjetjen e varrezave masive dhe për rritjen e presionit ndaj Serbisë për hapjen e arkivave dhe zbardhjen e fatit të të pagjeturve”, u shpreh ajo.
Të pranishëm ishin edhe nga Instituti i Mjekësisë Ligjore, të cilët nuk u prononcuan për media.
Një deklaratë për këtë çështje e dha të mërkurën edhe kryeministri në detyrë, Albin Kurti, gjatë lansimit të raportit preliminar për krimet e luftës në Kosovë.
“Dyshimi ynë i menjëhershëm kur kemi marrë vesh se janë gjetur mbetje mortore, natyrisht ka qenë se bëhet fjalë për grupin e intelektualëve, 23 sosh, të cilët u rrëmbyen dhe u zhdukën dhunshëm më 19 prill të vitit 1999, pra grupi i intelektualëve në Mitrovicë. Ne nuk mund ta konfirmojmë që bëhet fjalë për ta, por ky ka qenë dyshimi ynë i menjëhershëm; sidoqoftë, duhet t’i presim organet tona që të na tregojnë se për çfarë bëhet fjalë atje”, tha Kurti.
Ndërkohë, dy persona janë arrestuar të martën nën dyshimin për krime lufte në Zubin Potok, me ç’rast Gjykata Themelore në Prishtinë, këtë të mërkurë ua caktoi masën e paraburgimit prej një muaji.
