Vazhdojnë gërmimet në lokacionin e njohur si Përzhina, pranë varrezave të qytetit të Rahovecit, ku ditët e fundit janë zbuluar disa mbetje mortore që dyshohet të jenë të viktimave të luftës dhe pjesë e listës së personave të zhdukur.
Në vendngjarje janë prezentë pjesëtarë të EULEX-it dhe KFOR-it, të cilët po asistojnë autoritetet lokale në procesin e gërmimeve dhe hetimit.
Sipas planifikimeve operacionale, gërmimet filluan të mërkurën, ku u gjetën dy pjesë ështërore, të cilat janë dërguar për ekzaminim në Institutin e Mjekësisë Ligjore. Gjatë ditës së enjte, janë gjetur mbetje mortore të të paktën një individi, që mund t’i përkasin viktimave të luftës të listuara si të zhdukur.
Procesi i gërmimeve po realizohet nga Instituti i Mjekësisë Ligjore, Sektori për Hetimin e Personave të Zhdukur gjatë Luftës në kuadër të Drejtorisë së Policisë për Hetimin e Krimeve të Luftës, si dhe Komisioni Qeveritar për Persona të Zhdukur.
