Njësitë e Policisë së EULEX-it kanë bastisur shtëpinë e ish-pjesëtarit të Ushtrisë Çlirimtare të Kosovës, Behar Berishës. Ky i fundit ka qenë bashkëluftëtar i Sali Mustafës – Calit. Aty prezent ishte edhe Policia e Kosovës.
Mëngjesi i gjeti këtu.
Pjesëtarë të Policisë së Kosovës u panë të enjten në lagjen “Kodra e Trimave” në Prishtinë.
Ata u thirrën për asistencë të një bastisjeje nga hetuesit e Eulex-it dhe Zyrës së Prokurorit të Specializuar. Cak i këtij aksioni ishte ish-luftëtari i Ushtrisë Çlirimtare të Kosovës Behar Berisha që ishte edhe bashkëpunëtor i ish-komandantit, Salih Mustafa.
E pas 8 orësh bastisjeje, pjesëtarë të Eulex-it u larguan nga vendi i ngjarjes. Bashkë me disa gjësende që dyshohet se u sekuestruan, ata nuk pranuan të flasin para kamerave.
Kurse, familjarët e Berishës ishin të paqasshëm.
E gjatë gjithë kohës sa u zhvillua ky aksion, rruga ishte e bllokuar.
Kjo gjë nuk i pëlqeu këtij banori të kësaj lagjeje i cili tha se nuk do duhej të ndodhte një gjë e tillë.
Kurse sa i përket bastisjes, banorët e kësaj zone nuk pranuan të flasin duke thënë prapa kamerës se ish-luftëtari nuk është në gjendje të mirë shëndetësore.
