Basketbollisti Valon Bunjaku është shpallur lojtari më i mirë i ndeshjes së pestë finale mes Bashkimit dhe Trepçës, ku skuadra prizrenase arriti një fitore të rëndësishme me rezultat 85–77.
Me këtë triumf, Bashkimi e ka shtyrë serinë finale të paktën edhe për një përballje tjetër.
Bunjaku pati një paraqitje fenomenale dhe luajti rol vendimtar në fitoren e skuadrës së tij.
Ai u vlerësua me çmimin MVP nga Federata e Basketbollit të Kosovës, bazuar edhe në votat e tifozëve.
Djaloshi nga Prizreni qëndroi në parket për 31 minuta e gjysmë, duke regjistruar 15 pikë, 7 kërcime dhe 6 asistime.
Ai nuk humbi asnjë top gjatë ndeshjes, realizoi një bllokadë, vodhi një top dhe kundërshtarët shkaktuan ndaj tij plot 6 gabime personale – një tregues i ndikimit të tij në lojë.
E për në fund, Bunjaku kishte indeksn 22, më të lartin në skuadër.
Ndeshja e gjashtë e finales zhvillohet të enjten, në orën 19:00. Nëse Trepça fiton, atëherë shpallet kampione e Superligës së Kosovës, ndërsa nëse Bashkimi arrin ta barazojë serinë në 3–3, gjithçka do të vendoset në ndeshjen e shtatë.
