Valon Berisha nuk do të jetë përforcimi i ri i FK Zhelezniqarit.
Mesfushori me përvojë ka refuzuar ofertën e klubit nga Grbavica, duke mos e parë këtë transferim si një opsion për vazhdimin e karrierës së tij.
Përfaqësuesi 32-vjeçar i Kosovës, aktualisht pjesë e LASK-ut, kishte marrë një ofertë zyrtare nga klubi boshnjak, megjithatë vendimi i tij ka qenë negativ. Lajmi është konfirmuar nga gazetari italian Lorenzo Lepore, i cili ka bërë të ditur se Berisha po shqyrton alternativa të tjera.
“Valon Berisha ka refuzuar ofertën zyrtare të FK Zhelezniqarit dhe aktualisht po konsideron opsione të tjera për të ardhmen e tij”, ka shkruar Lepore.
Berisha, i njohur për eksperiencën e tij në kampionate të forta evropiane dhe për kontributin e dhënë me fanellën e Kosovës, mbetet një emër i kërkuar në treg, ndërsa pritet të shihet se ku do ta vazhdojë karrierën në periudhën e ardhshme.
