Kolektivi për Mendim dhe Veprim Feminist ka reaguar pas vrasjes së 21-vjeçares nga ish-bashkëshorti i saj në Qendrën për Punë Sociale në Ferizaj.
KMVF thotë se ky rast tregon që vajzat dhe gratë nuk janë askund të sigurta.
“Ky rast i femicidit është duke treguar që vajzat dhe gratë në Kosovë nuk janë askund të sigurta. Ato dhunohen e vriten në shtëpi, në strehat e shtetit, në rrugë e në spitale, pa mbrojtje e pa siguri nga shteti”.
Në fund, Kolektivi për Mendim dhe Veprim Feminist ka konfirmuar se të hënën nga ora 17:30 do të mbahet protestë.
“Ne thërrasim në revoltë dhe demonstratë gjithëpopullore, këtë të hënë në sheshin “Zahir Pajaziti” duke filluar nga ora 17:30. Të hënën e çdo ditë tjetër luftojmë për sigurinë tonë dhe të çdo vajze dhe gruaje në Kosovë. Luftojmë që asnjë grua të mos frikësohet, dhunohet a vritet.
Kjo protestë organizohet nga aktivistë/e të pavarura dhe anëtaret/ët e Kolektivit Feminist”, thuhet në njoftim.
21-vjeçarja është vrarë brenda Qendrës për Punë Sociale në Komunën e Ferizajt nga ish-bashkëshorti i saj 36-vjeçar. I dyshuari la të plagosur edhe 15-vjeçarin, vëllaun e viktimës. Autori i krimit u arrestua nga Policia e Kosovës, edhe pse i njëjti provoi të arratiset. /teve1.info/
