Dy vajza të mitura janë raportuar të zhdukura nga prindërit e tyre në Fushë Kosovë, pasi janë larguar nga banesa dhe janë parë duke hipur në një veturë me targa vendore, në drejtim të panjohur.
Sipas Policisë së Kosovës, rasti është paraqitur më 9 korrik nga dy prindër të shqetësuar, të cilët kanë deklaruar se vajzat e tyre kanë dalë nga banesat më 4 korrik rreth orës 19:56 dhe nuk dihet ende vendndodhja e tyre.
“Me datë 09.07.2025 dy ankues – prindër, kanë raportuar se, me datën e cekur vajzat e tyre të mitura, kanë dalë nga banesat e tyre dhe së bashku dyshohet se kanë hipur në një veturë me targa vendore dhe janë larguar në drejtim të panjohur, deri tani nuk dihet vendndodhja e tyre”, thuhet në raportin e Policisë.
Lidhur me rastin është informuar edhe prokurori kompetent, ndërsa njësitet policore kanë nisur hetimet për zbardhjen e ngjarjes dhe gjetjen e të miturave.
