Ushtruesi i detyrës së Kryeprokurorit të Shtetit, Besim Kelmendi, po intervistohet nga Prokuroria Speciale në lidhje me hetimet për masakrën e Reçakut. Dëshmia e tij ka filluar pas orës 13:00.
Kjo është konfrimuar nga Shoqata e Prokurorve dhe Prokuroria Speciale.
“Prokuroria Speciale mund të konfirmojë se Ushtruesi i Detyrës së Kryeprokurorit të Shtetit, z. Besim Kelmendi, është ftuar për intervistim në cilësinë e dëshmitarit, në kuadër të procesit hetimor që lidhet me rastin për të cilin keni parashtruar pyetje. Prokuroria Speciale shpreh vlerësimin për gatishmërinë dhe kontributin që z. Kelmendi ka dhënë në zbardhjen e një çështjeje penale që është në trajtim nga Prokuroria Speciale”, thuhet nga Prokuroria Speciale.
Në reagimin e Shoqatës së Prokurorëve është thënë se Prokurori paraqitet para organit kompetent kur i kërkohet në çfarëdo cilësie
“Prokurori i Shtetit paraqitet para çdo organi kompetent sa herë që kërkohet, në cilëndo cilësi procedurale, dhe kjo është pjesë normale e funksionimit të sistemit të drejtësisë. Kjo nuk është ngjarje e jashtëzakonshme dhe as nuk krijon bazë për interpretime tendencioze apo ndërtim narrativesh që nuk qëndrojnë në realitet. Shoqata e Prokurorëve kërkon nga media që e ka publikuar këtë lajm që të raportojë me korrektësi, pa shtrembërime dhe pa spekulime. Publikimi i informacioneve të pa verifikuara dhe mënyra e paraqitjes së tyre në opinion rrezikon të krijojë perceptime të dëmshme ndaj Prokurorit të Shtetit dhe është i papranueshëm. Prokurori i Shtetit e ushtron funksionin e tij me profesionalizëm, pavarësi dhe integritet. Shoqata do të reagojë në çdo rast kur dinjiteti profesional i prokurorit tentohet të dëmtohet përmes raportimeve të pasakta, konkluzioneve të pabazuara ose përdorimit të rasteve procedurale për qëllime sensacionaliste”, thuhet në reagimin e tyre.
