Një studim i publikuar në revistën Neuron tregon se sa më shumë që ushtrohen minjtë, aq më shumë forcohen lidhjet mes disa neuroneve në tru, duke i bërë ato më të shpejta dhe më të lehta për t’u aktivizuar.
Ky “rindërtim” i trurit rezultoi thelbësor që minjtë të përmirësonin gradualisht qëndrueshmërinë në vrapim, ka raportuar Nature.
Sipas neuroshkencëtarit Nicholas Betley nga Universiteti i Pensilvanisë, truri luan rol aktiv në zhvillimin e qëndrueshmërisë fizike.
“Ti del për vrap, mushkëritë zgjerohen, zemra punon më mirë, muskujt shkatërrohen dhe rindërtohen. Të gjitha këto ndodhin dhe herën tjetër bëhet më e lehtë. Nuk e prisja që truri po e koordinonte gjithë këtë proces”, ka thënë ai.
Çfarë ndodh në tru?
Studiuesit u përqendruan te zona e trurit e quajtur hipotalamusi ventromedial, që rregullon oreksin dhe sheqerin në gjak.
Aty ata studiuan një grup neuronesh që prodhojnë një proteinë të quajtur SF1, e lidhur me metabolizmin.
Gjatë vrapimit në pistë, këto neurone aktivizoheshin. Interesante ishte se një pjesë e tyre bëhej aktive vetëm pasi përfundonte ushtrimi.
Pas disa javësh ushtrimesh, jo vetëm që u rrit numri i neuroneve të aktivizuara pas vrapit, por edhe intensiteti i aktivizimit të tyre.
Kur studiuesit analizuan trurin e minjve pas tre javësh ushtrimesh, zbuluan se ishte bërë më e lehtë që neuronet të aktivizoheshin.
Për më tepër, ushtrimet e përsëritura kishin dyfishuar numrin e qelizave që nxisin neuronet që dërgojnë sinjale elektrike.
Çfarë ndodh kur këto neurone “fiken”?
Me anë të një teknike të quajtur optogjenetikë, shkencëtarët i çaktivizuan këto neurone pas ushtrimit dhe panë se minjtë nuk përmirësonin më performancën e tyre dhe lodheshin më shpejt.
Sipas doktorit të studimit Jeffrey Zigman nga Universiteti i Teksasit Southwestern, ani pse mund të ketë zona të tjera të përfshira, studimi “thekson rëndësinë, madje ndoshta funksionin thelbësor, të këtyre neuroneve në zhvillimin e qëndrueshmërisë”.
“Sa më shumë që ushtrohesh, aq më shumë lidhje nervore nxitëse zhvillohen dhe aq më e madhe bëhet qëndrueshmëria”, ka thënë ai.
Madje, kur studiuesit rritën artificialisht aktivitetin e këtyre neuroneve pas ushtrimit, minjtë vrapuan më larg dhe më shpejt se ata që kishin bërë të njëjtin trajnim pa këtë stimulim shtesë.
Çfarë do të thotë kjo për njerëzit?
Betley ka thënë se në të ardhmen mund të eksplorohet nëse këto neurone mund të stimulohen edhe te njerëzit, për të ndihmuar rikuperimin e masës muskulore pas sëmundjeve, për ta ruajtur atë me kalimin e moshës, apo madje për të rritur performancën sportive.
Por për momentin, kjo mbetet ide për të ardhmen.
“Për tani, është e rëndësishme që njerëzit ta kuptojnë se ushtrimet nuk kanë të bëjnë vetëm me muskujt. Ato po e ndryshojnë gjithë trurin”, ka thënë ai.
