Ushtria izraelite vrau të paktën tetë palestinezë në disa zona të Rripit të Gazës të dielën në mëngjes pasi marrëveshja e armëpushimit me Hamasin u vonua, thanë shërbimet e urgjencës.
Al Jazeera raportoi një sulm në al-Shaaf, një lagje në lindje të qytetit të Gazës, ku u vranë tre palestinezë dhe u plagosën disa të tjerë dhe kishte gjithashtu sulme në Beit Hanoun të Gazës veriore.
Pak para hyrjes në fuqi të armëpushimit, Izraeli tha se nuk do të fillonte derisa Hamasi të lëshonte një listë të robërve që do të liroheshin.
Hamasi tha se ishte i përkushtuar ndaj armëpushimit dhe vonesa në dhënien e listës ishte për shkak të “arsyeve teknike në terren”.
Ushtria izraelite tha se do të vazhdojë të sulmojë Rripin e Gazës, megjithëse ky mesazh nuk u prit në kohë nga shumë palestinezë, të cilët filluan të ktheheshin në shtëpitë e tyre vetëm për t’u përballur nga tingujt e armëve dhe zjarrit të artilerisë.
Izraeli gjithashtu njoftoi se kishte gjetur trupin e Oron Shaul, një ushtar izraelit i vrarë në Gaza gjatë luftës së vitit 2014 në enklavën palestineze, raporton Middle East Eye.
Pavarësisht kundërshtimit të fortë nga elementë të koalicionit të kryeministrit Benjamin Netanyahu, kabineti i Izraelit miratoi marrëveshjen në një votim të premten. Gjatë 15 muajve, Izraeli ka vrarë mbi 46,000 palestinezë.
Sipas tekstit të plotë të marrëveshjes së armëpushimit, faza e parë – e cila do të zgjasë gjashtë javë – do të përfshijë shkëmbimin e robërve izraelitë dhe të burgosurve palestinezë dhe një kthim në “qetësinë e qëndrueshme”.
Armëpushimi ishte vendosur zyrtarisht të fillonte në orën 08:30 të mëngjesit me kohën lokale të së dielës.
Tre robëresha izraelite të gjalla do të liroheshin pas orës 16:00, me autoritetet izraelite që lironin rreth 95 të burgosur palestinezë – kryesisht të mitur ose femra – menjëherë më pas.
Tridhjetë e tre robër izraelitë të mbajtur në Gaza do të lirohen në total si pjesë e fazës së parë.
Ata do të lirohen në këmbim të palestinezëve që vuajnë dënimin e përjetshëm në një raport 1:3 dhe palestinezëve që vuajnë dënime të tjera në raportin 1:27, sipas marrëveshjes.
