Ushtria izraelite ka shkatërruar më shumë se 300 shtëpi gjatë tre ditëve të fundit në lagjen Zeitoun në Rripin qendror të Gazës, si pjesë e planit të saj të vazhdueshëm të pushtimit.
Mahmoud Basal, zëdhënësi i Mbrojtjes Civile në Gaza, ka thënë të mërkurën se ushtria izraelite ka kryer sulme të rënda në Zeitoun, duke synuar qëllimisht zonat e banimit civil.
Ai vuri në dukje se forcat izraelite shënjestruan veçanërisht ndërtesat me pesë kate ose më shumë, dhe për shkak të eksplozivëve të përdorur, janë shkatërruar edhe strukturat përreth, citon Anadolu.
Disa shtëpi u shkatërruan ndërsa banorët ishin ende brenda, duke shkaktuar viktima, me shembje të kryera pa paralajmërim paraprak dhe bombardime intensive që i penguan ekipet e mbrojtjes civile të arrinin tek të plagosurit.
Izraeli po përballet me dënime në rritje për luftën e tij gjenocidale në Gaza, ku ka vrarë më shumë se 61,700 njerëz që nga tetori i vitit 2023.
Në nëntorin e kaluar, Gjykata Ndërkombëtare Penale lëshoi urdhër-arreste për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavë.
