Ushtria izraelite ka bombarduar nga ajri edhe 75 pika në Rripin e Gazës në të cilën ajo ka zgjeruar sulmet e saj tokësore me qëllim për ta bërë pushtimin e saj të përhershëm, raporton Anadolu.
Sulmet izraelite në Rripin e Gazës ku jetojnë afërsisht 2,3 milionë palestinezë, vazhdojnë duke u bërë gjithnjë e më intensive.
Pasi zgjeroi sulmet e saj tokësore më 18 maj për ta bërë pushtimin të përhershëm, ushtria izraelite vazhdon të bombardojë Gazën edhe nga ajri.
Për shkak të sulmeve më shumë se 161.000 palestinezë janë zhvendosur në Gaza javën e fundit, ndërsa banorët e Gazës po detyrohen të migrojnë për shkak të “urdhrave të evakuimit” të ushtrisë izraelite.
Në një deklaratë me shkrim të bërë nga ushtria thuhet se në 24 orët e fundit në Gaza janë kryer sulme ajrore ndaj 75 pikave. Ndërsa pretendohet se në sulme u goditën “objektiva” që u përkasin grupeve palestineze.
Në anën tjetër sipas burimeve palestineze, ushtria izraelite shënjestroi me sulmet ajrore në pjesë të ndryshme të Gazës, shtëpitë dhe tendat e civilëve në të cilët janë të strehuar palestinezë të zhvendosur.
Në një deklaratë të bërë dje nga ministria palestineze e Shëndetësisë në Gaza, u njoftua se 107 persona, përfshirë shumë gra dhe fëmijë, humbën jetën në sulmet izraelite gjatë 24 orëve të fundit.
Numri i palestinezëve të vrarë në sulmet e Izraelit në Rripin e Gazës që nga 7 tetori 2023 është rritur në 53.762 ndërsa numri i të plagosurve në 122.197.
Thuhet se ende ka mijëra të vdekur nën rrënojat në Rripin e Gazës.
