Daniel Edri, një ushtar 24-vjeçar i IDF-së, i dha fund jetës të shtunën në pyllin Biriya, pranë qytetit Safed, ku kishte kaluar fëmijërinë.
Ai kishte vuajtur nga probleme të rënda të shëndetit mendor, ndërsa përpiqej të përballonte dhimbjen, imazhet dhe aromat që e përndiqnin nga përvojat e tij në Liban dhe Gaza, ka shkruar The Jerusalem Post.
Nëna e tij, Sigal, po i bën thirrje autoriteteve që Danielit t’i jepet një funeral ushtarak, në nderim të shërbimit të tij. Deri më tani, kjo kërkesë nuk është miratuar. Ajo tha se djali i saj kishte shërbyer për periudha të gjata në vijat e para të luftimeve në të dyja frontet – në jug dhe veri.
“Danieli më tregonte për tmerret që kishte parë. Më thoshte: ‘Mami, nuk mund të ndal së nuhaturi trupat dhe i shoh trupat gjatë gjithë kohës’”, kujtoi ajo.
Gjendja e tij mendore u përkeqësua ndjeshëm me kalimin e kohës. Javën e kaluar, ai kërkoi të shtrohej në një spital psikiatrik, nga frika se mund t’i bënte diçka vetes. Megjithatë, personeli i spitalit i kërkoi të priste dhe e siguroi se së shpejti do të transferohej në një qendër kujdesi.
“Koha nuk ishte në anën e tij. Dhimbja ishte shumë e madhe për ta përballuar,” tha nëna e tij duke qarë.
