Ishte bërë pjesë e Forcës së Sigurisë së Kosovës qysh në vitin 2013.
Por, Besim Xhava pas 11 vitesh shërbim në uniformën shtetërore, vendosi të lë këtë profesion.
Përmes një postimi në Facebook, ai u shpreh se deri te ky vendim ka ardhur si pasojë e mungesës së meritokracisë në këtë institucion.
“Pas 11 viteve shërbim sot zyrtarisht nuk jam më pjesë e FSK-së. Arsyeja e këtij vendimi është për shkak të padrejtësive të mëdha që më janë bërë nga oficerë të FSK siç i bëhen shumicës të pjesëtarve aty (normal atyre që nuk kanë të njofshëm). Kush më ka njoftë dhe ka pasë rastin me punu me mua e din kontributin tim që kam dhënë për FSK”, ka shkruar ai.
Ish-ushtari thekson se përgjatë këtyre viteve sa ka shërbyer ka pasur edhe lëndime serioze për të cilat nuk ka marrë trajtim asnjëherë nga shteti.
“Fatkeqësisht njerëzit që punojnë nuk vlerësohen në vendin tonë dhe pushtetin e kanë disa oficerë të cilët FSK-në e konsiderojnë si pronë të tyre e jo institucion shtetëror. Gjatë 11 viteve shërbim asgjë nuk përfitova përveçse një lëndim serioz në vendin e punës në boshtin kurrizor për të cilin nuk i interesoi askujt. Nuk i kam pasë borgj kërkujt por më kanë mua shumë”, shprehet Xhava.
Këto dorëheqje nga ushtria e vendit po i sheh shqetësuese edhe koloneli në pension i FSK-së, Hysen Gecaj.
Ai thotë se mungesë të meritokracisë ka pasur në vazhdimësi aty dhe se kjo ndikon negativisht në motivimin e ushtarakëve.
“Kjo ndikon shumë te ushtarakët për shkak se trajnimet janë trajnime shumë të vështira, shumë intensive dhe sigurisht pjesëtarët të cilët janë të uniformuar e dojnë këtë punë dhe kur nuk respektohet puna e tyre dhe atëherë ata zhgënjehen dhe sigurisht që ajo e para që e mendojnë është largimi nga ky institucion”, thotë Gecaj.
Tëvë1 ka kërkuar përgjigje edhe nga Forca e Sigurisë së Kosovës se a janë të vërteta këto pretendime, mirëpo gjatë ditës nuk ka pasur përgjigje.
