Kryetari i Prishtinës, Përparim Rama, ka paralajmëruar masa të rrepta ndaj vendpunishteve ndërtimore në kryeqytet, pas shqetësimeve për sigurinë në terren.
Ai bëri të ditur se është krijuar “Komisioni për Vlerësimin Emergjent të të gjitha vendpunishteve”, i përbërë nga ekspertë të urbanizmit, inxhinierë të licencuar dhe përfaqësues të emergjencave, i cili do të nisë menjëherë inspektimet në të gjitha kantieret aktive.
Sipas Ramës, çdo vendpunishte ku konstatohet shkelje apo rrezik për sigurinë do të mbyllet pa vonesë.
Ai theksoi se këto raste do t’i nënshtrohen analizave të detajuara institucionale, të cilat mund të çojnë deri në revokimin e lejeve të ndërtimit.
Po ashtu, ai paralajmëroi përgjegjësi edhe për inspektorët komunalë që nuk kanë raportuar parregullsitë në terren, duke theksuar se askush nuk do t’i shpëtojë llogaridhënies.
Rama u bëri thirrje kompanive ndërtimore që të bashkëpunojnë me institucionet dhe të respektojnë ligjin, duke nënvizuar se siguria publike mbetet prioritet kryesor.
“I shqetësuar me gjendjen aktuale në terren dhe me qëllim të rritjes së sigurisë publike, sot në mëngjes kam ftu drejtorët e Kryeqytetit dhe marrë vendim për krijimin e “Komisionit për Vlerësimin Emergjent të të GJITHA vendpunishteve në territorin e Kryeqytetit”, ka shkruar ai në një postim në Facebook.
