Ushtarë të KFOR-it, të caktuar në Batalionin e Rezervës Taktike (KTRBN), kanë nisur një dislokim të përkohshëm në selinë e EUFOR-it në Kampin Butmir, Bosnje e Hercegovinë, për të marrë pjesë në stërvitjen shumëkombëshe “Quick Response 2025”.
Kjo stërvitje zhvillohet çdo vit nën drejtimin e EUFOR ALTHEA, me qëllim të rritjes së gatishmërisë, bashkëpunimit dhe aftësive të përbashkëta operacionale mes trupave nga vendet kontribuuese dhe forcave ndërkombëtare paqeruajtëse.
Siç njofton KFOR-i, stërvitja e koordinuar thekson angazhimin e përbashkët për paqe dhe stabilitet afatgjatë në Ballkanin Perëndimor.
“Duke stërvitur dhe vepruar së bashku, misionet e KFOR-it dhe EUFOR-it forcojnë sigurinë rajonale, thellojnë besimin reciprok dhe përmirësojnë aftësinë kolektive për t’iu përgjigjur me shpejtësi dhe efikasitet sfidave të reja”, u tha në njoftimin e KFOR-it.
