Në tubimin përmbyllës të fushatës në Prishtinë, kandidati për kryetar, Uran Ismaili, ka kritikuar qeverisjen aktuale, duke thënë se qyteti nuk mund të vazhdojë me të njëjtën administratë që ka ofruar vetëm arsyetime dhe premtime të pambajtura.
“Katër vitet e fundit nuk kanë sjellë ndryshimin e nevojshëm për qytetin. Qytetarët ende përballen me errësirë, mbeturina, mungesë uji dhe trotuare të dëmtuara. Koha e justifikimeve ka mbaruar,” tha Ismaili, duke shtuar se Prishtina ka nevojë për punë konkrete dhe për kujdes të përditshëm nga kryetari i saj.
Ai theksoi se qyteti meriton vepra konkrete dhe projekte të realizueshme, jo vizione që mbeten vetëm në letër. “Unë besoj në një kryeqytet që i jep fund premtimeve të harruara dhe rikthen shpresën për qytetarët e tij,” deklaroi Ismaili.
Në përmbyllje, ai u bëri thirrje qytetarëve që më 12 tetor të votojnë për ndryshim, duke theksuar se Prishtina ka nevojë për një qeverisje që punon për njerëzit, jo për pushtetin.
