Kandidati për kryetar të Prishtinës nga PDK, Uran Ismaili, ka prezantuar listën prej 56 kandidatëve për Asamblenë Komunale, e cila përbëhet nga profesionistë, arkitektë, urbanistë dhe qytetarë aktivë nga të gjitha lagjet e kryeqytetit.
Sipas Ismailit, mbi 40% e listës janë gra, ndërsa 70% e kandidatëve garojnë për herë të parë, duke sjellë energji të re dhe përfaqësim të gjerë nga Velania në Ulpianë, nga Dardania në Arbëri, nga Bregu i Diellit në Kodrën e Trimave e deri te Kolovica dhe Hajvalia.
“Sot e kam nderin t’ju prezantoj me ekipin tim që do t’ju përfaqësojë në Asamblenë e Prishtinës. Një listë me qytetarë aktivë nga çdo lagje që i njohin problemet e qytetit dhe kanë vullnetin të bashkëpunojnë për ta bërë Prishtinën një qytet që funksionon,” ka shkruar Ismaili.
Ai ftoi qytetarët që ta përkrahin listën e tij, të cilën e cilësoi si përfaqësuese të vizionit për një Prishtinë më të jetueshme dhe funksionale gjatë katër viteve të ardhshme.
