Një ditë më parë, Policia e Kosovës mbylli pjesërisht rrugën mbi urën e Bernjakut për të parandaluar kontrabandën. E televizioni mëson se kjo rrugë është përdorur nga kontrabanduesit edhe pak para sulmit të 24 shtatorit në Banjskë të Zveçanit.
Është rreth 20 kilometra larg komunës së Zubin Potokut.
Ndonëse për qytetarët e kësaj zone është frekuentuar shumë pak, kjo urë në Bërnjak e cila gjendet në pikën zero të kufirit midis Kosovës dhe Serbisë, u përdor nga kontrabanduesit serbë.
Televizioni ka mësuar ekskluzivisht se kjo urë lidhëse e shteteve fqinje në veri të vendit, u përdor nga serbët edhe për kontrabandim të armëve pak para sulmit të 24 shtatorit në Banjskë të Zveçanit.
Se kjo zonë u përdor për veprimtari të tilla, e konfirmoi zëvendësdrejtori i Policisë për rajonin e veriut, Veton Elshani.
“Në të gjitha rrugët ilegale kanë qenë të hapura, ka pas mundësi që të hynë armë, pra të gjitha kontrabanda përfshirë edhe armë edhe ajo rrugë aty është shumë me benefit për kontrabanduesit”, ka thënë Elshani.
E të enjten, Policia e Kosovës vuri barrikada betoni pjesërisht për të pamundësuar aktivitete të paligjshme nga Serbia.
“Ka qenë njëra ndër rrugët e pakta që ne e kemi ditur që ka mundësi të zhvillohet kontrabanda por nuk e kemi bllokuar për arsye të fshatarëve të cilët lëvizin aty, por edhe dje edhe më herët e bllokuam për kamion, për mjete të rënda, jo për vetura. Sidoqoftë, ajo zonë komplet kontrollohet edhe me metoda të tjera policore jo vetëm me ato barrikada të betonit që janë aty”, deklaroi Elshani.
Kryetari i komunës së Zubin Potokut, Izmir Zeqiri tha për televizionin se ky veprim i organeve të shtetit është në interes të qytetarëve.
“Unë kujtoj se është në interes të të gjithë qytetarëve sepse nuk duhet të lejohet llojet e ndryshme të mallrave të hynë pa kaluar nëpër Doganë kështu që gjithçka ajo çfarë është, mjetet mallrat duhet të kalojnë nëpër Doganë, jo të hasin në patrulla të Policisë”, ka thënë Zeqiri.
E njohësi i sigurisë, Arben Dashevci, konsideron se mbyllja e rrugëve ilegale është në dobi të shtetit.
“Këto veprime, në aspektin e sigurisë unë i cilësoj si veprime tejet të domosdoshme tejet të drejta, tejet të mira dhe ligjore sepse janë në dobi të Republikës së Kosovës, të buxheti të Kosovës dhe qytetarëve që jetojnë nË Republikën e Kosovës, por edhe ata që jetojnë matanë lumit Ibër”, theksoi Dashevci.
Së fundi, policia e Kosovës ka mbyllur rreth 27 rrugë ilegale në katër komunat veriore në zonat të cilat lidhin Kosovën me Serbinë.
