Universiteti Erasmus i Roterdamit (EUR) në Holandë njoftoi të enjten pezullimin e menjëhershëm të bashkëpunimeve institucionale me tre universitete izraelite: Universitetin Bar-Ilan, Universitetin Hebraik të Jerusalemit dhe Universitetin e Haifës.
Sipas deklaratës zyrtare, vendimi u mor në bazë të rekomandimeve të Komitetit Këshillimor të Pavarur për Bashkëpunime të Ndjeshme (ACGS), i cili vlerësoi se ekziston një rrezik i lartë që përmes këtyre bashkëpunimeve EUR të përfshihet indirekt në shkelje të të drejtave të njeriut.
“Bashkëpunimet ndërkombëtare janë të bazuara në parime si liria akademike dhe diplomacia shkencore,” u shpreh Annelien Bredenoord, presidente e Bordit Ekzekutiv të universitetit.
“Megjithatë, kjo liri ka kufij kur të drejtat themelore të njeriut janë të rrezikuara. Hetimi i komitetit na çoi në përfundimin se ky rrezik është tepër i madh.”
Komiteti identifikoi një rrezik të konsiderueshëm për përfshirje të Universitetit Bar-Ilan në shkelje të të drejtave të njeriut, ndërsa për dy universitetet e tjera u përmendën për lidhjet e tyre me Forcat e Mbrojtjes të Izraelit (IDF).
Si rrjedhojë, EUR do të ndalojë jo vetëm projektet ekzistuese, por edhe çdo nismë të re kërkimore me këto institucione.
Në deklaratë thuhet gjithashtu se çdo bashkëpunim i mundshëm në të ardhmen me Universitetin Hebraik të Jerusalemit dhe Universitetin e Haifës do të varet nga distancimi i tyre i qartë nga përfshirja në aktivitete që shkelin të drejtat e njeriut, në veçanti në lidhje me kërkimin shkencor në territoret e pushtuara dhe marrëdhëniet e tyre me IDF-në, ka shkruar Anadoly.
Duke e pranuar se vendimi mund të ngjallë reagime të ndryshme, Bordi Ekzekutiv theksoi solidaritetin me të gjithë të prekurit nga lufta në Rripin e Gazës.
“Ne shohim se studentët dhe stafi, si ata me prejardhje hebraike/izraelite ashtu edhe ata që mbështesin kauzën palestineze, ndihen gjithnjë e më pak të lirë për të shprehur mendimet e tyre. Kjo na shqetëson thellësisht.
Ne mbetemi të përkushtuar ndaj një ambienti universitar të sigurt, të hapur dhe të respektueshëm, ku mendimet e ndryshme mund të shprehen lirshëm, edhe pse ndonjëherë perceptimi i pasigurisë është i vështirë për t’u eliminuar plotësisht.”
