Në secilën nga këto uniforma është shënuar emri i atyre që u përkasin.
Hashim Thaçi, Rexhep Selimi, Kadri Veseli dhe Jakup Krasniqi do t’i vishnin këto uniforma në ditët më të shënuara të vendit.
Por, për shkak të pamundësisë që t’u dorëzoheshin atyre, uniformat iu dhuruan pasardhësve të ish-krerëve të UÇK-së.
E gjithë kjo u bë gjatë ngjarjes “Uniformat e Lirisë”, e cila u organizua për krerët e UÇK-së që aktualisht po përballen me drejtësinë në Hagë.
Organizator i kësaj ngjarjeje ishte Benito Mares, një nga mbështetësit e Ushtrisë Çlirimtare të Kosovës.
“Ideja ime për dhurimin e disa prej uniformave lindi pas një ceremonie në Skenderaj kur e pash z. Ferid Berishën të veshur më këtë uniformë. Atje e pyeta komandant Shkupin se çfarë përfaqësonin këto uniforma dhe ai më shpjegoi domethënien e tyre. Pas atij takimi, mendova për katër burrat që ndodhen në Hagë”, ka thënë Mares.
Krenarinë për pranimin e uniformës e shprehu djali i Jakup Krasniqit.
Ndërsa Shqipe Selimi, bashkëshortja e Rexhep Selimit, tha se pret që burri i saj ta veshë këtë uniformë sa më shpejt.
Nga aty u bë e ditur gjithashtu se më 14 shtator do të mbahet një protestë, por jo në Kosovë.
Në këtë ceremoni morën pjesë edhe shumë pjesëtarë të tjerë të Ushtrisë Çlirimtare të Kosovës, familjarë dhe miq të krerëve të UÇK-së.
