James Elder, zëdhënës i UNICEF-it në Gaza, ka kritikuar planin e shpërndarjes së ndihmave të mbështetur nga SHBA-të dhe i kontrolluar nga Izraeli, duke thënë se përbën një “fasadë” mashtruese të përdorur për të manipuluar dhe zhvendosur një popullsi që vuan nga uria.
Duke folur për Anadolu, Elder përshkroi se si mekanizmi i Fondit Humanitar të Gazës (GHF) është bërë një mjet zhvendosjeje në një territor në prag të urisë.
“Situata ushqyese është katastrofike”, tha Elder. “Sapo kam folur me një ekspert të të ushqyerit, një koleg të të ushqyerit, i cili e bëri shumë të qartë se nëse gjërat vazhdojnë kështu, mohimi i vazhdueshëm i ndihmës humanitare për këtë popullsi do të thotë se po përballemi me zi buke. Nuk ka qenë kurrë kaq e rëndë.”
Pasi u kthye së fundmi në Gaza për vizitën e tij të pestë që nga fillimi i ofensivës izraelite në tetor 2023, Elder përshkroi një pamje të zymtë: djem adoleshentë me lot në sy që trokasin në xhamat e makinave, duke treguar brinjët e tyre nga dëshpërimi
“Sigurisht, tani ka një nivel dëshpërimi, sepse njerëzit thjesht po përpiqen të gjejnë mënyra për të ushqyer familjet e tyre”, tha ai.
Ai e akuzoi mekanizmin për joshjen e civilëve me ushqim në vende shumë të militarizuara. Dy incidente të fundit me viktima masive në vende të tilla, tha ai, tregojnë rrezikun e këtij sistemi.
“Ata krijuan mekanizëm shumë larg në Jug, një formë të militarizuar të dhënies së disa ndihmave, dhe atje ka pasur dy masakra. Njerëzit ende kthehen në vendin e një masakre, sepse është i vetmi vend ku mund të marrin ushqim.”
“Sigurisht që po josh një popullsi me ushqim duke u përpjekur t’i zhvendosë me forcë. Kjo është e qartë.”
Ndërprerja e shpërndarjes së ndihmave pas incidenteve vdekjeprurëse në qendrat e saj është një provë e mëtejshme, argumentoi Elder, e paqartësisë dhe mungesës së llogaridhënies së saj.
“Kjo nuk është një organizatë humanitare, kjo është një organizatë ushtarake”, tha ai. “Kjo maskë ndihme është për të qetësuar një pjesë të presionit perëndimor… Nuk është një modalitet ndihme. Nuk ka të bëjë me këtë. Është një fasadë dhe është shumë e rrezikshme”.
Dhjetëra persona janë qëlluar për vdekje në Gaza pasi forcat izraelite hapën zjarr në disa raste ndaj palestinezëve që kërkonin ndihmë nga Fondacioni Humanitar i Gazës (GHF), një grup i mbështetur nga SHBA-të dhe Izraeli që ka vepruar në enklavë që nga 27 maji.
