Agjencia e OKB-së për fëmijë ka bërë të ditur se mbi 13,000 fëmijë janë vrarë në Gaza në ofensivën e Izraelit, duke shtuar se shumë fëmijë vuanin nga kequshqyerja e rëndë dhe “nuk kishin as energji për të qarë”.
“Mijëra të tjerë janë plagosur ose nuk mund të përcaktojmë as se ku janë. Ata mund të mbeten nën rrënoja. Ne nuk e kemi parë atë shkallë vdekjesh në mesin e fëmijëve në pothuajse asnjë konflikt tjetër në botë”, tha Catherine Russell, drejtoresha ekzekutive e UNICEF-it.
“Kam qenë në pavijone të fëmijëve që vuajnë nga kequshqyerja e rëndë e anemisë, i gjithë pavioni është absolutisht i qetë. Sepse fëmijët, foshnjat nuk kanë as energji për të qarë”.
Russell tha se kishte “sfida shumë të mëdha burokratike” duke lëvizur kamionë në Gaza për ndihmë. Kritikat ndërkombëtare janë shtuar mbi Izraelin për shkak të numrit të të vdekurve të luftës, krizës së urisë në Gaza dhe akuzave për bllokimin e dërgesave të ndihmave.
Sulmi ushtarak i Izraelit në Gazën e qeverisur nga Hamasi ka zhvendosur pothuajse të gjithë popullsinë e saj prej 2.3 milionë banorësh, ka shkaktuar një krizë urie, ka rrafshuar pjesën më të madhe dhe ka vrarë mbi 31,000 njerëz, sipas Ministrisë së Shëndetësisë së Gazës. Kjo ka çuar gjithashtu në hetimin e akuzave për gjenocid në Gjykatën Botërore.
