Janë dëgjuar dy dëshmitarë në gjyqin në mungesë ndaj Sllavisha Filiq, i akuzuar për krime lufte. Ata dëshmuan për maltretimet dhe keqtrajtimet e përjetuara nga Filiq, dhe ndanë informacione rreth përfshirjes së tij në zhdukjen e doktorit, Hafir Shala.
“Unë e di që Sllavisha Filiq e ka marrë Hafir Shalën”- rrëfimi i dëshmitarëve për të akzuarin Filiq
Banka e të akuzuarit, është e zbrazët.
Kjo pasi Sllavisha Filiq, nuk është i arritshëm për organet e sigurisë.
Megjithatë ndaj tij po zhvillohet gjykimi në mungesë për krime lufte.
Për krimet, që Filiq dyshohet se ka kryer, dëshmoi Hamdi Hyseni.
Ai tregoi për maltretimet që ia kishin bërë gjatë kohës sa kishte qenë i ndaluar atë kohë nga sigurimi i shtetit serb.
“Mu sigurimi i shtetit më ka kidnapu, më ka mbajtë 46 ditë. Më kanë torturuar. Unë kisha shenja në trup. Dhe janë bërë shtatë muaj e nuk më janë largu shenjat e torturës. Mu kanë dashtë me m’vra qysh e kanë vra doktor, Hafir Shalën”, ka thënë Hamdi Hyseni – dëshmitar
Hyseni shpalosi dëshmi edhe për rastin e Hafir Shalës, doktori i cili që nga lufta figuron si i zhdukur.
Gisht, në këtë dyshohet që ka Filiq, i cili akuzohet se pasi e kishte ndaluar doktorin bashkë me dy persona të tjerë, e kishin dërguar në Sigurimin Shtetëror të Serbisë, ndaj të cilit më pas ishte ushtruar dhunë.
Këtë, e pohoi edhe dëshmitari Hyseni.
“Unë e di që Filiqi e ka marrë sepse janë bërë verifikimet prej Fadil Sylës dhe Pershiqit, në bazë të përshkrimit të këtyre dy personave që janë shpëtuar e s’kanë vdekur, ka dalë që është Filiqi. Dhe unë e kam njoftë personalisht atë, Sllavishën. E kam përcjellë, plus kur më kanë kidnapuar ka ardhë ma ka vendos alltinë qetu (bën me dorë kah koka), unë kam qenë i lidhur në karrige”, tregoi Hyseni.
Këtë e mbështeti Selman Kadriu, dëshmitari tjetër në gjyqin ndaj Filiqit.
Ai tregoi se para se të arrestohej, policia serbe e kishte bastisur shtëpinë e tij, ku ia kishin marrë edhe pesë vetura.
Njëra prej tyre, dyshohet se është përdorur edhe në rrëmbimin e doktorit, Hafir Shala.
“Të vetmin sen që e kam ditë unë rreth kësaj çështje, ka qenë se automjeti mu ka plaçkit prej shpije kur jam arrestu për herë të parë. Automjeti me të cilin thonë se është kidnapu (Hafir Shala)”, tha dëshmitari tjetër, Selman Kadriu.
Këtë veturë, dëshmitari thotë se disa herë e kishte parë duke e vozitur i akuzuari, Sllavisha Filiq.
“Ka pasë shumë raste që e kam taku në Prishtinë automjetin. E kanë vozit këta të Sigurimit Shtetëror, por më shumë Sllavisha Filiq”, tha ai
Para trupit gjykues, Kadriu tregoi edhe për keqtrajtimin e përjetuar gjatë kohës sa kishte qenë i ndaluar, e që në krye të tyre kishte qenë i akuzuari.
“Si kryesor i maltretimeve të mia kanë qenë Sllavisha Filiqi dhe Xhafer Beiqi”, tregoi Kadriu
Madje si pasojë e dhunës së ushtruar, ai thotë se përfundonte i alivanosur.
“Çdo natë më kanë nxjerrë nëpër koridore që e lidhin burgun me ndërtesën e Sigurimit Shtetëror. Për anej n’kamë, për knej n’qebe, i alivanosun”, u shpreh ai.
Dëshmitari tregon që edhe sot jeton me pasojat e asaj kohe.
“Nuk e di se si kam shpëtu, çka po mujke njeri me duru. Moti i dekun, qe hala gjallë. Jetoj me një ushtimë në kokë ton kohën, më çmend”, deklaroi në seancë ai.
Gjyqi ndaj Filiq, do të vazhdojë me dëgjimin e një dëshmitari tjetër.
