Ish-diplomati, Sylë Ukshini ka komentuar vendimin e Lidhjes Demokratike të Kosovës, e cila në mbledhjen e Këshillit të Përgjithshëm të mbajtur të shtunën shpalli kandidaturat për president dhe kryeministër.
LDK bëri të ditur se bartësja e listës, Vjosa Osmani, do të jetë kandidate për presidente të vendit, ndërsa Lumir Abdixhiku kandidat për kryeministër.
Ukshini e cilësoi këtë si një strategji legjitime politike, duke theksuar se çdo subjekt politik ka të drejtë t’i përcaktojë paraprakisht pozicionet e synuara institucionale.
Sipas tij, LDK me këtë veprim synon të krijojë energji pozitive për fushatën zgjedhore, ndonëse theksoi se formimi i institucioneve varet edhe nga pajtimi i partive të tjera politike.
“Në radhë të parë vendimi i LDK-së për zgjedhjet parlamentare ku Vjosa Osmani do të jetë kandidate për president dhe Abdixhiku për kryeministër është strategji legjitime e çdo subjekti që t’i përcaktoj paraprakisht pozicionet edhe pse ne e dimë që pastaj këto krejt varen nga fuqia e votës, sigurisht që nuk është e kollajshme sepse ne nuk kemi sistem të drejtpërdrejt të zgjedhjes së presidentes, që këto ngërçet politike e kanë vërtetua që është mirë që me zgjedh drejtpërdrejt. Mendoj që ata kanë dashur ta krijojnë si një energji për fushatë elektorale, madje sikur LDK të dilte e para po supozoj, prapë nuk është e mundur të bëhen, sepse kjo e kërkon një pëlqim nga partitë e tjera”, ka deklaruar Ukshini në emisionin “Ditari” në Tëvë1./teve1.info/
