Forcat ruse kanë interceptuar më shumë se 100 dronë ukrainas që shkonin drejt pothuajse një duzine rajonesh të Rusisë, tha të martën Ministria e Mbrojtjes në Moskë, gjë që detyroi të katër aeroportet përreth Moskës të pezullojnë përkohësisht fluturimet.
Nëntë aeroporte të tjera regjionale ruse kanë ndaluar funksionimin derisa dronët qëlluan zonat përreth kufirit me Ukrainën dhe më thellë brenda Rusisë, sipas agjencisë së aviacionit civil të Rusisë, Rosaviatsia, dhe Ministrisë së Mbrojtjes.
Ishte nata e dytë radhazi që rajoni i Moskës thuhet se u shënjestrua, raporton AP.
Dy persona u plagosën në rajonin e Kurskut, sipas guvernatorit lokal Alexander Khinshtein, dhe disa dëme u raportuan në rajonin e Voronezhit.
Sulmi me dron vjen dy ditë përpara një armëpushimi të njëanshëm 72-orësh në luftën më shumë se trevjeçare të shpallur nga Presidenti Vladimir Putin, i cili përkon me festimet në Moskë që shënojnë Ditën e Fitores në Luftën e Dytë Botërore.
Ndërkohë, forcat ruse qëlluan gjatë natës të paktën 20 dronë Shahed në Kharkiv, qyteti i dytë më i madh i Ukrainës pranë kufirit me Rusinë, duke plagosur katër persona, shkroi në Telegram Guvernatori rajonal Oleh Syniehubov.
Shtatë civilë të tjerë u plagosën diku tjetër në rajonin e Kharkiv nga bombat rrëshqitëse dhe dronë rusë, tha Syniehubov.
