Ukraina po vazhdon punën intensive për krijimin e fortifikimeve mbrojtëse në vijën e parë të fushëbetejës dhe deri më tani janë ndërtuar 2.130 fortesa për togat e mbrojtësve ukrainas dhe janë hapur më shumë se 3 mijë kilometra kanale antitank.
Kjo u njoftua nga ministri i Mbrojtjes Denys Shmyhal gjatë një vizite në rajonin Zaporizhzhia, ku dëgjoi një raport nga kreu i Shërbimit Special Shtetëror për Transportin, gjeneral major Oleksandr Yakovets, mbi gjendjen e fortifikimeve në rajonet Zaporizhzhia, Donetsk, Sumit, Kharkiv, Çernihiv dhe Kiev.
Sipas këtij raporti, forcat e Shërbimit Special Shtetëror për Transportin kanë ngritur gjithashtu më shumë se 1 mijë kilometra piramida antitank, të ashtuquajturat “dhëmbët e dragoit”, dhe 4 mijë e 300 kilometra të ashtuquajtura pengesa “të padukshme”.
Në veçanti, po kryhet punë për të forcuar potencialin mbrojtës në rajonet jugore dhe lindore me qëllim forcimin e vijës mbrojtëse dhe zvogëlimin e rreziqeve në fushën e betejës.
“Ne duhet të vazhdojmë të përshpejtojmë ritmin e ndërtimit të fortifikimeve dhe të përmirësojmë teknologjitë e ndërtimit, pasi ky është një moment kyç për aftësitë mbrojtëse të Ukrainës”, tha ministri Shmyhal në një postim në telegram, raporton Ukrinform, përcjell KosovaPress.
Kompetencat e zgjeruara të Shërbimit Shtetëror të Transportit Special bazohen në ligjin e nënshkruar nga presidenti Volodymyr Zelensky, i cili rregullon kompetencat e reja të shërbimit që përfshijnë ndërtimin e fortifikimeve, çminimin dhe ndërtimin e infrastrukturës ushtarake dhe strehimit për personelin ushtarak.
