Presidenti ukrainas, Volodymyr Zelenskyy ka thënë se dëshiron të arrihet një marrëveshje për garanci sigurie përpara çdo takimi me presidentin rus, Vladimir Putin.
Deklarata e tij u bë për gazetarët dhe u publikua të enjten, sipas agjencisë AFP.
“Ne duam të kemi një kuptim të arkitekturës së garancive të sigurisë brenda shtatë deri në dhjetë ditësh,” tha Zelenskyy, duke theksuar se një strukturë e qartë për sigurinë është thelbësore përpara se të mendohet për ndonjë bisedim me Moskën.
Ai shtoi gjithashtu se është e rëndësishme të dihet se “cili vend do të jetë i gatshëm të bëjë çfarë në çdo moment specifik”.
Sipas tij, një grup aleatësh të udhëhequr nga Britania dhe Franca po punojnë për krijimin e një koalicioni ushtarak për të mbështetur këto garanci sigurie.
Zelenskyy paralajmëroi se situata në terren mbetet e tensionuar, me të dyja palët që përgatiten për luftime të reja.
Ai deklaroi se Rusia ka grumbulluar trupa në vijën jugore të frontit, ndërsa Ukraina ka testuar një raketë të re lundrimi me rreze të gjatë veprimi, ka shkruar The Guardian.
Sa i përket vendndodhjes së mundshme për një takim të ardhshëm me Putinin, Zelenskyy tregoi preferencat e tij duke përmendur vende neutrale evropiane.
“Zvicër, Austri – ne jemi dakord… Për ne, Turqia është një vend i NATO-s dhe pjesë e Evropës. Dhe ne nuk jemi kundër,” u shpreh ai, duke lënë të hapur mundësinë që takimi të mbahet në një nga këto vende.
