Bashkimi Evropian ka përgatitur masa fillestare si sanksione kundër Kosovës për shkak të mospërfilljes së kërkesave për hapa të menjëhershëm nga Qeveria e Kosovës për uljen e tensioneve në veri.
Lidhur me këtë, analisti politik, Fidan Ukaj, vlerësoi që masat do të jena aktive derisa BE-ja dhe ShBA-ja e shohin që në terren ka zbatim të tri kërkesave të tyre.
Madje sipas tij, krizat e fundit në veri i kanë dhënë mësim Bashkësisë Ndërkombëtare, që njëanshmëria në dialog nuk ka prodhuar rezultate, shkruan teve1.info.
“Masat do të jenë aktive deri në momentin kur Bashkimi Evropian dhe Shtetet e Bashkuara të Amerikës e shohin që në terren ka zbatim të tri kërkesave të tyre. Por, uroj të mos mbesin në fuqi dhe dhe të përdoret si mekanizëm për ta shtyrë Kosovën në formimin e Asociacionit. Moszbatimi i marrëveshjes është strategji e Serbisë dhe do të provojë ta vazhdojë rrugën e avazit të vjetër nëse nuk do të ketë presion ndërkombëtar. Bashkësia Ndërkombëtare tashmë e kanë marrë një mësim, kriza e fundit ka treguar shumë, se njëanshmëria në dialog nuk prodhon rezultate. Qoftë Borrelli apo Lajçaku, kanë qenë të njëanshëm. Nuk kanë qenë parimor, nuk kanë qenë ndihmues”, deklaroi Ukaj në emisionin “Ditari”.
Ndërkaq, i pyetur për takimin e nesërm në Bruksel ndërmjet dy negociatorëve, Besnik Bislimi dhe Petar Petkoviqit, analisti politik tha se diskutimi i tyre do të jetë rreth tri pikave të Bashkimit Evropian,
“Pastaj do të kthehen tek pikat e dakorduara në Bruksel dhe Ohër”, theksoi tutje Ukaj në Tëvë1.
Më tej, duke folur për mundësinë e mbajtjes së zgjedhjeve të parakohshme në veri, Ukaj vlerësoi që gjasat janë që komuniteti serb do të marrë pjesë në këtë proces zgjedhor.
Kujtojmë që dialogu në mes të Kosovës dhe Serbisë pritet të vazhdojë të mërkurën në nivel kryenegociatorësh./teve1.info/.
