Sipas tij, Qeveria e Kosovës është dashur qysh në fillim të dëgjojë këshillën e ndërkombëtarëve dhe ta shtyjë implementimin e masës për targa.
“Përpjekjet e Bashkësisë Ndërkombëtare për të gjetur një zgjidhje, tashmë kanë marrë një dinamikë të re edhe pse unë mendoj që është vonë të gjindet një zgjidhje. Kjo zgjidhje është dashtë të provohet më herët. Është vonë sepse data 21, pra kemi edhe pak ditë nga fillimi i zbatimit të fazës së dytë që Qeveria e Kosovë e ka përcaktuar shqiptimin e gjobave për ata qytetarë që nuk e kanë bërë konvertimin e targave në RKS. Unë mendoj që Qeveria e Kosovës është dshur që në start të dëgjojë Bashkësinë Ndërkombëtare, vendet e Quintit, Shtetet e Bashkuara të Amerikës dhe të shtyjë këtë afat për implementimin e masës për targa”, tha ai.
I ftuar në emisionin “Ditari” , politologu Ukaj, theksoi se tashmë çështja e targave ka hyrë në një fazë të re, e që sipas tij, në këtë rast Qeveria nuk do të duhej të lëshonte pe karshi Serbisë, duke pasur parasysh që ai e cilësoi si masë legale dhe legjitime vendimin për targa. Sepse sipas tij, tërheqja e Kosovës karshi Serbisë në këtë rast do të fuqizonte gruper kriminale serbe.
“Mirëpo tani jemi në fazë të re dhe mendoj që Qeveria e Kosovës do të duhej t’i shkojë deri në fund kësaj mase, sepse dy tërheqjet e mëhershme meqë i kemi pasur përball strukturave paralele dhe kriminale serbe kanë krijuar një trimërim të këtyre strukturave përball institucioneve të Kosovës, se nëse ne i rezistojmë shtetit të Kosovës këta tërhiqen. Dhe edhe në këtë rast nëse institucionet e Kosovës tërhiqen nga një masë legale dhe legjitime që edhe SHBA, vendet e Quintit dhe i dërguari i SHBA-së për Ballkanin Perëndimor, Eskobar ka vlerësuar se është një masë legale dhe legjitime unë mendoj që vetëm do të fuqizoheshin strukturat paralele dhe ato kriminale”, shtoi ai.
Ndryshe sot përmes një postimi në Twitter, emisari i Bashkimit Evropian për dialogun Kosovë – Serbi, Miroslav Lajçak u shpreh se është urgjente që të gjendet një zgjidhje për targat në mënyrë që të garantohet siguria dhe stabiliteti./teve1.info./