Zyra e Këshilltarit të Posaçëm (OSC) në SHBA ka hapur një hetim ndaj Jack Smith, ish-prokurorit të posaçëm që udhëhoqi dy çështje penale kundër presidentit Donald Trump.
Hetimi ka të bëjë me dyshime për shkelje të ligjit “Hatch”, një ligj federal që ndalon zyrtarët e administratës nga përfshirja në veprimtari politike, për të ruajtur paanshmërinë e shërbimit civil.
Nisja e hetimit u kërkua nga senatori republikan Tom Cotton, i cili e akuzon Smith për “ndërhyrje të paprecedentë në zgjedhjet presidenciale të vitit 2024”, pasi hetimet e tij çuan në ngritjen e akuzave penale ndaj Trump. Trump i ka mohuar akuzat dhe i ka cilësuar hetimet si të motivuara politikisht. Pas fitores së tij në zgjedhjet e nëntorit 2024, të dy çështjet ndaj tij u mbyllën, pasi ligji amerikan ndalon ndjekjen penale të një presidenti në detyrë.
Zyra e OSC-së nuk ka autoritet për të ngritur akuza penale, por mund të ndërmarrë masa disiplinore ose t’i referojë rastet Departamentit të Drejtësisë për veprime të mëtejshme.
Hetimi ndaj Smith vjen në një klimë gjithnjë e më të tensionuar politike në SHBA, ku zyrtarë të lartë të administratës së mëparshme, përfshirë ish-drejtorin e FBI-së James Comey dhe ish-drejtorin e CIA-s John Brennan, po hetohen gjithashtu për akuza të ndryshme, përfshirë dëshmi të rreme para Kongresit.
Ndërkohë, ish-kreu i mëparshëm i OSC-së, Hampton Dellinger, u shkarkua nga administrata Trump në fillim të këtij viti, pasi mbështeti rikthimin në punë të disa punonjësve civilë të larguar gjatë presidencës së tij. Megjithëse një gjykatës e shpalli shkarkimin e tij të paligjshëm, Dellinger më pas hoqi dorë nga ndjekja ligjore, duke paralajmëruar se vendimi i ri i Trump për ta zëvendësuar mund të dëmtojë rëndë pavarësinë e institucionit.
Këto zhvillime theksojnë rritjen e ndikimit politik në institucionet e drejtësisë dhe të inteligjencës amerikane, si dhe përpjekjet për të rivlerësuar rolin e zyrtarëve që kanë hetuar ose sfiduar administratën Trump në të kaluarën./tvklan.al/
