Politologu Fidan Ukaj, tha se çështja e themelimit të Asociacionit të Komunave me shumicë serbe ka qenë pengesë për nënshkrimin e planit evropian nga kryeministri kosovar, Albin Kurti dhe presidenti serb, Aleksandar Vuçiq.
Kjo sipas tij, është nënkuptuar nga deklarata e Vuçiqut i cili i pari pas takimit deklaroi se kryeministri Kurti nuk u pajtua me formimin e Asociacionit të Komunave me shumicë serbe në Kosovë.
“Formimi i Asociacionit, këtu ka qenë dilema mes palëve dhe është shtyrë për një datë tjetër dhe ne shpresojmë që të ketë një dakordim në datën e dytë dhe ky plan evropian të nënshkruhet dhe të vazhdojmë rrugën”, tha ai.
Tutje Ukaj në emisionin “Info Nata” theksoi diskutimi ka qaluar sa i përket mosdakordimit për zbatueshmërinë e pikave të draftit evropian.
“Përderisa pala kosovare ka thënë se është dakord me të gjitha pikat, unë besoj që Kurti e ka pasë fjalën për pikat e draftit evropian. Por sigurisht ka qenë dilema te plani i zbatimit dhe këtu ka qaluar i gjithë diskutimi. Besoj se këtu ka qenë dilema, është prolonguar për një datë tjetër ky proces”, shtoi ai.
Ndryshe, presidenti i Serbisë, Aleksandar Vuçiq pas përfundimit të takimit me kryeministrin e Kosovës, Albin Kurti në Bruksel, ka thënë se ka insistuar për themelimin e Asociacionit të Komunave me shumicë serbe, por që në fund nuk kanë arritur marrëveshje.
“Nuk është arritur asgjë përveç që do të bisedojmë. Si të bisedojmë kur ka kundërshtime për Asociacioni të Komunave me shumicë serbe. Së pari duhet të zbatohet, sido që ta ktheni, Asociacioni është në rend të parë. Pastaj do të shohim çfarë do të ndodh tutje”, kishte thënë ndër tjerash Vuçiq./teve1.info./
