Njohësi i çështjeve politike, Fidan Uka tha se në takimin e radhës mes Kosovës dhe Serbisë në Ohër më 18 mars nuk do të ketë nënshkrim të marrëveshjes.
Uka thotë se është skeptik sa i përket Serbisë për pranimin e zbatimit të planit evropian.
“Nuk besoj se do të ketë një nënshkrim me datën 18 mars, pasi është një takim për të diskutuar dhe dakorduar. Ne dëgjuam Lajçakun se një ceremoni e nënshkrimit mund të ndodhë më vonë pasi pjesë e këtyre takimeve, hisedarë të këtyre proceseve janë dhe të tjerët. Që i bie që mund të ketë një ceremoni të nënshkrimit. Mirëpo jam skeptik sa i përket anës serbe të pranimit edhe të pjesës së dytë. Pjesa e parë e pranimit në parim nga presidenti Vuçiq ka qenë sa për të dëshmuar Brukselit se janë të gatshëm”, ka deklaruar ai në emisionin “Ditari” në Tëvë1.
Sipas tij, Vuçiqi do ta përdorë çështjen e Asociacionit të komunave me shumicë serbe si pretekst edhe me datën 18 mars për të mosnënshkruar marrëveshjen.
“(Vuçiq) Ishte shumë i pasinqertë sepse ishte i pari i cili doli në takim me mediat dhe fjalën e parë e akuzoi kryeministrin e Kosovës se ishte jo i gatshëm për marrëveshjen dhe moszbatimin e Asociacionit. Vuçiqi prapë do ta përdorë një element të tillë, Asociacionin do ta përdorë si pretekst se edhe me datën 18 mars për të mosnënshkruar rreth planit të implementimit të marrëveshjes”, tha ai.
Po ashtu, Uka thekson se nëse nuk do të ketë nënshkrim, i bie se ishte një diskutim i kot.
“Nëse nuk do të ketë një nënshkrim dhe afate kohore për implementim i bie se ka qenë një diskutim i kot dhe një marrëveshje që nuk e obligon palët. Në këtë rast i hap mundësi palës serbe që të mos jetë zbatuese e këtyre pikave”, përfundoi ai. /Teve1.info/
