Nën emocione Nedime Ujkani kujton masakrën që forcat serbe kishin kryer në familjen e saj më 6 prillit të vitit 1999.
Ajo thotë vrasja se ishte e planifikuar, pasi ushtra serbe një ditë më parë kishin pyetur se ku janë anëtarët e familjes Ujkani.
Për ngjarjen ku i janë vrarë edhe prindërit, Ujkani thotë se e mban mend aq sa i ka treguar gruaja e axhës e cila ka qenë dëshmitare okulare.
“Sipas asaj diku në orën 14 në katër shtëpitë e familjes Ujkani kanë hy në të njëjtën kohë, krismat e dyerve janë dëgjuar në të njëjtën kohë ata i kanë marrë personat në të njëjtën kohë”, tha Ujkani.
Pikërisht për vrasjen dhe djegien e kufomave të familjes Ujkani si dhe për krimet e kryera në Vushtrri, akuzohen dy ish policët serb Dragan Miloviq dhe Zoran Kostiq.
Të martën nisi edhe gjykimi ndaj tyre.
Por të vonuar këtë proces e konsideron Nedime Ujkani.
“Mendoj që është proces tejet i vonuar pasi kanë kaluar 25 vite, fatkeqësisht kanë vdekur edhe dëshmitarët e rastit deri tani në familje time si dëshmitar ka mbetur vetëm Bilall Ujkani, ndërsa dëshmitarja e rastit Nazmije Ujkani ka ndërruar jetë”, tha ajo.
Megjithatë, thotë se mbetet me shpresën se drejtësia do të vihet në vend, pasi dy të akuzuarit për vite të tëra kanë lëvizur dhe jetuar të lirë.
“Unë shpresoj shumë që kanë me kry punën siç duhet sepse ata janë shëtit për 25 vite jo shumë larg prej fshatit tonë 12 km në Mitrovicë, ndërsa ne e kemi vuajt procesin për 25 vjet”.
Sipas aktakuzës, dy ish policët serbë në bashkëkryerje akuzohen se kishin vrarë, masakruar, torturuar dhe dëbuar popullatën civile në Komunën e Vushtrrisë.
