UEFA më në fund ka thyer heshtjen e saj në lidhje me gjyqtarin Szymon Marciniak pas një vale kritikash nga kampi i Barcelonës, pas eliminimit nga Interi në gjysmëfinale të Ligës së Kampionëve.
44-vjeçari drejtoi fitoren dramatike 4-3 të Interit në ndeshjen e dytë kundër Barçës në gjysmëfinalen e Ligës së Kampionëve, e cila vulosi një fitore të përgjithshme 7-6 për të besuarit e Simone Inzaghit për të siguruar një finale kundër PSG-së në Mynih më 31 maj.
Marciniak është vënë nën kritika të ashpër nga Barcelona, me Pedrin që kërkon një hetim mbi performancën e tij dhe trajnerin Hansi Flick që pretendon se “çdo vendim 50-50” shkonte në favor të Interit.
Reagimet kanë qenë të ashpra, të përqendruara kryesisht në vendimin e tij për të mos akorduar një goditje dënimi për një faull të perceptuar ndaj Gerard Martin në prag të golit të barazimit të Interit në minutat shtesë – një moment që në fund i dha fund shpresave të Barcelonës për të arritur në finale dhe për të kompletuar një tripletë këtë sezon.
Megjithatë, pavarësisht zhurmës nga Barcelona, përgjigjja e UEFA-s ka qenë dukshëm më mbështetëse për gjyqtarit polak.
Ndryshe nga ajo që shtypi spanjoll mund të dëshironte të kishte ndodhur, organi drejtues ka marrë një qëndrim shumë më të matur dhe pozitiv.
UEFA nuk gjeti asnjë të metë apo gabim në performancën e Marciniak, duke riafirmuar besimin e tyre tek gjyqtari polak, i cili më parë ka gjykuar si finalen e Kupës së Botës ‘Katar 2022’ ashtu edhe finalen e Ligës së Kampionëve 2023.
Sipas gazetës Marca, kur u pyet për Marciniak, një zëdhënës i UEFA-s u përgjigj thjesht: “Nuk ka asnjë problem”.
Është interesante që Marciniak tani shihet si një kandidat kryesor për të gjykuar finalen midis Interit dhe Paris Saint-Germain, pasi kolegu i tij Clement Turpin është përjashtuar për shkak të kombësisë së tij franceze.
Ai gjithashtu pritet të gjykojë në Kupën e Botës për Klube të ripërtërirë në Shtetet e Bashkuara këtë verë.
Duke qenë se ka gjykuar 674 ndeshje në garat evropiane dhe aziatike, ai mbetet një nga gjyqtarët më të besuar të UEFA-s.
