Disa prej kristaleve të Muzeut Shtetëror të Mineraleve të Trepçës tani kanë zënë vend në hapësirat e Muzeut Kombëtar të Kosovës. Për nder të 15-vjetorit të pavarësisë ato vijnë përmes ekspozitës “Udhëtimi frymëzues i minatorëve” dhe e njëjta është e hapur për vizitorët deri më datë 24 të këtij muaji.
Ibrahim Musa nga Muzeu i Kristaleve në Mitrovicë tha se kjo ekspozitë po hapet edhe për nderë të javës së minatorëve.
“E falënderojmë Muzeun e Kosovës për bashkëpunimin për ta hapur këtë ekspozitë sepse mendoj që ka rënësi të veçantë sepse është ekspozitë për nder të pavarësisë dhe për nderë të javës së minatorëve. Ne i ftojmë të gjithë të marrin pjesë dhe t’i shikojnë këto kristale, i ftojmë edhe në muzeun tonë atje të vijnë dhe ta shikojnë sepse Kosova ka shumë kristale dhe në muzeun tonë gjenden ato por ne i kemi sjellë një pjesë të tyre të ju tregojmë të gjithëve sa të bukura dhe sa ja vlejnë këto kristale”, tha ai.
Driton Avdiu, historian në Muzeun e Kosovës tha se kjo ekspozitë i jep një pamje të veçantë kësaj hapësire ku ruhet trashëgimia historike dhe kulturore e vendit.
“Po e përjetojmë një moment frymëzues me hapjen e kësaj ekspozita të veçantë me minerale dhe kristale, kjo ekspozitë ofron një pamje të veçantë në Muzeun Kombëtar të Kosovës me titullin ‘Udhëtimi frymëzues i minatorëve’. Hapja e kësaj ekspozite është nderi madh sepse jemi duke përshëndetur një pjesë të kaluarës sonë historike. Për nder të 15-vjetorit të pavarësisë dhe të muajit shkurt, ‘Udhëtimi frymëzues’ i minatorëve është një dëshmi e përkushtimit të një koleksioni mineral dhe kristal që është i veçantë për mënyrën se si e mahnitë syrin e vizitorit”, tha ai.
Kjo ekspozitë, me autor Driton Avdiun, ka për qëllim të ndihmojë publikun që të njoh dhe vlerësojë kontributin e minatorëve të Trepçës në shtetndërtimin e Kosovës./kp
