Për 15 orë, u bllokuan në hyrje të Kosovës.
E më në fund, pasditen e së mërkurës, autobusët me udhëtarë kosovarë, nga autoritetet serbe u lejuan të hyjnë në Kosovë.
Por, jo të gjithë e patën këtë fat.
Në shtetin serb, dita e enjte i zuri edhe pesë zyrtarë policor të Kosovës, përfshirë zëvendësdrejtorin nga komunitetet, Dejan Jankoviq.
Këtë e bëri të ditur, presidentja e vendit, Vjosa Osmani në orët e para të mëngjesit.
“Përderisa vazhdimisht përballemi me sfida të sigurisë, mos të harrojmë edhe në këto momente pesë policë të Republikës sonë po mbahen peng nga një shtet shovinist, nga Serbia”, ka deklaruar ajo.
E në mesditë, u njoftua se 4 nga 5 policët e ndaluar në Serbi, u lanë të lirë.
Këtë e bëri të ditur, vet kryeministri i Kosovës, Albin Kurti, në mbledhjen e qeverisë.
“Informacionet e fundit na njoftojnë që të gjithë policët e ndaluar të cilët i përmenda në fjalën time hyrëse tashmë janë liruar, përveç zëvendësdrejtorit të përgjithshëm të Policisë së Kosovës Dejan Jankoviq. Pra zëvendësdrejtori policisë vazhdon që të mbahet në burg në Serbi”, ka thënë ai.
Tëvë1 ka pyetur në Prokurorinë e Serbisë në Rashkë, për arsyen e ndalimit të policëve të Kosovës.
Por të enjten këta nuk kanë kthyer përgjigje.
Ndërsa këtë e bëri të ditur, ministri i brendshëm kosovar.
“Sipas informatave që kam ai është dërguar në paraburgim për 48 orë, me akuzën për ‘prishje të rendit Kushtetues’. Akuzë të cilën vetë presidenti Aleksandar Vuçiq e përmendi në adresimin e tij gjatë vizitës në njësitin ‘Kobra’”, ka thënë Sveçla.
E të papranueshëm arrestimin e Dejan Jankoviq, e ka quajtur edhe shefi i tij, Gazmend Hoxha.
“Është një veprim i padrejtë totalisht, në kundërshtim me çdo rregull dhe qarkullimin e lirë të njerëzve, agresivitet i paparë deritashëm në këtë aspekt”.
Për mos lirimin e zëvendësdrejtorit të policisë, Dejan Jankoviq, ka reaguar edhe ambasadori amerikan në Kosovë, Jeffrey Hovenier.
Pas një takimi me presidenten e Kosovës, Hovenier tha se Serbia shkeli marrëveshjen për lëvizjen e lirë dhe se pajtohen me reagimet e Bashkimit Evropian.
“Stano ishte mjaft i qartë në këtë çështje dhe se si BE-ja i sheh gjërat. Ne pajtohemi me BE-në, edhe SHBA-ja pret që të gjitha zotimet e arritura përmes dialogut të zbatohen plotësisht nga Serbia dhe Kosova”.
Për këtë çështje ka reaguar edhe ambasadori gjerman në Kosvë, Jorn Rhode.
Në platformën “X” Rode ka shkruar se ky veprim nuk pritet nga një vend kandidat për BE-së.