Samiti i G7-ës në Francë po mbyllet sot me takime mes liderëve botërorë dhe diskutime mbi zhvillimet e fundit në Lindjen e Mesme.
Në një deklaratë të përbashkët të publikuar më herët, udhëheqësit e G7-ës bënë thirrje për “një armëpushim të menjëhershëm” në Liban.
“Në Liban, ne mbështesim, nëpërmjet një armëpushimi të menjëhershëm dhe të fuqishëm, përpjekjet e udhëheqjes libaneze për të arritur çarmatimin e Hezbollahut dhe monopolin e armëve, si dhe për të mbrojtur integritetin territorial dhe sovranitetin e Libanit me garancitë e duhura ndërkombëtare të sigurisë”, thuhet në deklaratë.
Në të njëjtën deklaratë, liderët e G7-ës u zotuan gjithashtu të “përshpejtojnë përpjekjet humanitare dhe të rindërtimit” në Gaza, si dhe të zbatojnë “masa relevante politike dhe të sigurisë”.
“Ne bëjmë thirrje për t’i dhënë fund dhunës në Bregun Perëndimor”, thanë udhëheqësit e G7-ës, raporton Guardian.
Sulmet e kolonëve izraelitë dhe operacionet ushtarake kundër palestinezëve në Bregun Perëndimor të pushtuar janë bërë gjithnjë e më të shpeshta.
Organizatat për të drejtat e njeriut i kanë përshkruar këto veprime si pjesë të një fushate abuzimi dhe presioni, që synon largimin e palestinezëve nga tokat e tyre dhe zgjerimin e vendbanimeve izraelite.
Në incidentin më të fundit, kolonët izraelitë vandalizuan dhe i vunë flakën një xhamie në fshatin palestinez Jaljilya, sipas raportimeve lokale.
Fotografi të publikuara nga vendi i ngjarjes tregojnë dëme të konsiderueshme brenda objektit dhe grafite në gjuhën hebraike të shkruara në mure.
Ndërkohë, sekretari i përgjithshëm i NATO-s, Mark Rutte, përshëndeti marrëveshjen midis Shteteve të Bashkuara dhe Iranit për t’i dhënë fund luftës në Lindjen e Mesme.
Ai tha se rihapja e planifikuar e Ngushticës së Hormuzit do të përbënte një “hap masiv përpara”.
“E di që shumë aleatë, nëpërmjet iniciativës së udhëhequr nga Franca dhe Mbretëria e Bashkuar, janë të gatshëm të mbështesin”, tha Rutte në një konferencë për shtyp në Bruksel.
